رساله لن تصل ابدا

By ليس فقيرا من يحب on 9:56 م

التعليقات (64)

Filed Under:





فاكر يا حبيبى اول مرة شوفتك فيها كنت انا لسه رايحه اولى ثانوى

وانت فى سنه تالته فاكر وانا نازله السلم لما اتشنكلت وقعت على

وشى وكل الصبيان والبنات اللى ع السلم قعدو يضحكو الا انت

طلعت جرى وخدتنى من ايدى وساعتها كانت رجلى بتوجعنى قوى

بجد ومكنتش قادرة امشى قولتلى لو كنتى رفيعه شويه كنت شيلتك

بس الجدعنه مش هتنفع الوقت ده وقعدنا نضحك قوووووى
كنت مكسوف تسندنى او حتى تمسك ايدى
فاكر لما ناديت على واحده زميلتى قولتلها ممكن تسنديها

بس لحد الزائرة الصحيه
وفضلت ماشى معانا ورحت اشتريتلى رباط ضاغط الممرضه

ربطت بيه رجلى

اهو الرباط الضاغط ده كان اول شرارة قصه الحب بينا


كل شويه اجيب التلاته جنيه ونص بتوع الرباط واجى انادى عليك

خد تمن الرباط تقعد تضحك وتقولى يلا جرى على الفصل

بصراحه انا كنت بافرح لما مش ترضى تاخد الفلوس علشان

الاقى حجه اكلمك بيها مرة تانيه وبصراحه كمان انا كنت واخده

بالى قوى انك بتفضل ماشى ورايا لحد ما اركب العربيه
واصلا كنت باشوفك الصبح وبابقى عارفه انك قاعد مستنينى لما اطلع
طب اقولك سر لو كنت يوم مش لاقيتك قاعد مستنى كنت بادايق قوى

واحس ان اليوم كده انضرب
وسر كمان انا كنت باعمل نفسى مش واخده بالى خالص

مع انى كنت واخده بالى جدا من كل حركه بتتحركها

وكل بصه بتبصهالى فى الخباثه وكنت بافرح من قلبى قوى ومعرفش ليه
من اول يوم شوفتك وانا حسيت انى هيكونلى معاك حكايه كبيرة

كنت واد دحيح جايب 98 ونص فى سنه تانيه

وعمال تقرقض فى ضوافرك من كتر المزاكرة وتخيل
يا حبيبى انك كنت انت الوحيد تقريبا فى الصبيان بتوع المدرسه

كلهم اللى بتروح بالشنطه ومعاك كتبك وكشاكيلك كان كل المدرسين

بيحبوك قوى وبيضربو بيك المثل فى كل فصل ويقولو قد ايه انت

طالب مهذب وملتزم وشاطر
مرة سرقت كشكول التعبير بتاعك من مدرس العربى وذهلت لما شوفت

روعه خطك واسلوبك فى الكتابه خطك كان حلو قوى يا حبيبى ومترتب قوى

عارف انى فريت الكشكول ورقه ورقه مش عارفه ليه بس قعدت اصفح

وفعلا لقيت اللى قلبى بيدور عليه وشوفت اول قلب مقسوم وفيه
اول حرف من اسمى واسمك مش عارفه ليه كنت متأكده انى انا المقصوده

ويومها وشى احمر قوى وحطيت الكشكول بسرعه ورحت قعدت فى التخته بتاعتى

ودفنت راسى بين ايديا وقعدت اعيط


احنا كنا حاسين بعض قوى وقعدنا نص السنه مكتفيين بالنظرات

لحد انت ما استجمعت قوى الشجاعه بتاعتك كلها وكتبتلى جواب

وخبيته فى الاكلاسير بتاعى مكنش فيه غير كلمتين بحبك وبس
ونفس القلب المقسوم اللى شوفته فى كراسه التعبير ورجعت تانى

بعد الجواب ده تكتفى بالنظرات
انا مقدرة قوى يا حبيبى قد ايه كان صعب عليك تعمل كده

وانت كل الناس عارفه عنك الالتزام وانك
مش بتاع بنات ولا تسالى انا كنت عارفه ومتأكده انك احسن

واحد فى العالم انا حبيتك قوى وحسيتك قوى قوى


وفاكرة قوى اخر يوم فى امتحانات السنه كنت انت قاعد مستنى

قدام المدرسه لقيتك جاى عليا ولاول مرة احس انك مش مكسوف

منى ولا مرتبك زى عادتك
وقولتلى انا باحبك هتستنينى ؟ ....

فاكر انا رديت عليك قولتلك ايه .....
طب خد الفلوس بتاعت الرباط وقعدنا نضحك وسط خجل

وكسوف وارتياح وقلق ومشاعر كتير قوى متلغبطه
ما انت كنت عارف الرد يا اهبل دنا ما صدقت انك نطقتها

دنا لولا الملامه وكسوفى واحراجى من انى واقفه باكلم ولد

فى الشارع كنت اترميت فى حضنك وفضلت اعيط
....
وخلصت السنه وانت جبت 98 وقدمت فى طب بشرى

مع انك كنت عاوز تروح اداب قسم صحافه
طول عمرك طيب يا حبيبى اتكسفت حتى تقول لابوك

انا نفسى ادخل كليه تانيه غير الطب ولاقيته ملهوف
ان ابنه يكون دكتور وجيت على نفسك علشان تسعده
طول عمرك عايش بس علشان تسعد قلوب الناس وتفرحها
وعدت الايام

....
وفضلنا بردو نحب بعض من بعيد لبعيد وكنت باشوفك وانت

واقف مستنينى عنددرس الكيميا والفرنساوى وكل فين وفين

لما نلاقى فرصه نتكلم فيها تلت اربع دقايق كنت بتقضيهم نصايح

ذاكرى كويس يا توتا ركزى فى الكيميا الفرنساوى منخسرش فيه ولا درجه
اوعى تنسى الاكسونات يا توتا الاكسونات عليها درجات

الكيمياء العضويه سهله بس حبيها
الماده يا توتا هتحبيها هتحبك وتديكى اعلى درجه ....


وفى وسط النصايح دى

كنت بتطلع كيس المصاصات والشوكلاته تحطهم فى شنطتى
انا بصراحه كنت باعمل نفسى مش واخده بالى علشانك

كنت بتتكسف اوى لما تجيبلى مصاصه
مع انى كنت بافرح اووووى كل لما تفتكر الحاجات اللى باحبها وتعملها
انا عارفه انى رغايه قوى يا حبيبى طب ما انت فاكر كل المواقف دى

من غير ماحكيها بس انا عاوزة احكيهالك عاوزة افضل ارددها

اصلى بافرح اوى وانا باحكيها يا حبيبى

يا حبيبى يا حبيبى يا حبيبى


ما انت عارف انى باحب اقولك يا حبيبى علطول
فاكر لما كنت تيجى من الكليه وتقولى مبحبش الدراسه

خالص يا توتا انا نفسى احول من الكليه وانا اقولك لا يا حبيبى

دانا مش عارفه اتخيلك غير وانت دكتور اد الدنيا

وتقولى انت هو فى دكتور بيخاف كده من منظر الدم وانا اقعد اضحك

واقولك فشر دا انت دكتور زى القمر وتتكسف وتضحك وانا اتكسف واضحك
كنت عارفه انك رقيق قوى بس بردو كنت عارفه انك هتتفوق رغم كل الظروف


طب فاكر قد ايه كنت باكره الفيزيا وانت تقولى انا باحب الفيزيا يبقى

لازم تحبيها ياتوتا اشمعنى انا حبيت المصاصات والشوكلاته زيك
شدى حيلك وادخلى طب انتى كمان وهنتفتح عيادتنا سوا

وهنعمل يومين فى العياده بنص الكشف بس
وهنفتح مستوصف لاهل البلد ومش هناخد منهم اى فلوس يا توتا
اوعى يا توتا لما تكبرى تتغرى وتنسى الناس الطيبه
اوعى يا توتا الدنيا تلهيكى عن ربنا او عن صلاتك
فاكر لما اتفقنا نحفظ القرءان وانا مصرة نحفظ من

جزء عم وانت مصر نحفظ من سورة البقرة
فى الاخر محبتش تزعلنى وبدأنا من جزء عم

وكل لما احفظ سورة تجيبلى كيس مصاصات كبير


ياه يا حبيبى انت كنت رقيق كده ازاى


كل لما كنت اقولك انا مش عارفه ليه خايفه من اللى جاى

تقولى لا يا توتا اللى جاى فى ايد ربنا وربنا مبيعملش لينا

غير الخير حتى لو فى الظاهر بتاعه شر
ارمى حمولك على ربنا ومتخافيش

مش هاسيبك ابدا يا توتا
كنت بتطمنى قوى يا حبيبى كنت باحس بالامان

وعمرى ما خوفت لحظه وانت جنبى
..
فاكر لما رحت جيبتلى نتيجه الثانويه ولاقتنى مجموعى

نزل قوى ومش نافع خالص ادخل اى كليه فى المرحله الاولى

قولتلى كده انتى هتحققيلى حلمى وهتدخلى الكليه
اللى انا كنت عاوزها ودخلت الاداب قسم صحافه يا حبيبى
وبقيت صحفيه قد الدنيا اهو وباكتبلك الجواب ده وانا قاعده على مكتبى
فى جريده محترمه قوى واوعى تقول ان اللغه اللى انا باكتبلك بيها

الجواب ركيكه وانى صحفيه فاشله
لا يا حبيبى انا باكتبلك كده علشان انت حبيبى

وباخرج الكلام من قلبى على الورقه علطول

ياااااااااه انت ليك ذكريات كتير قوى معايا يا حبيبى


توتا عاوز اجى اتقدم بقى


لا يا حبيبى ابويا مش هيجوز الصغيرة قبل الكبيرة


يا توتا عادى منا لسه هاخلص كليتى وانتى هتخلصى

كليتك تكون الامور بقت احسن

لا يا حبيبى اصبر بقى وبعدين هتروح منى فين انا قاعده على قلبك

يا حبيبتى انتى بتجرى فى دمى
وبتروحى مع الدم على القلب بس مبتخرجيش تانى
توتا هاتقدم واللى يحصل بقى


كده هتضيع الفرصه لو اترفضت المرة دى اصبر

باحبك ....
بادوب فيك
....
حبيبى اوعدنى تروح للدكتور ومتستناش على الصداع ده
علشان خاطرى روح للدكتور يا دكتور
انت حالك مش عاجبنى انا مش هاسكت على تعبك ده يا تروح للدكتور
يا والله العظيم هاروح لابوك اقوله ونكتفك ونوديك غصب عنك
....
باحبك حتى وانتى هبله باحبك بجنون والله
.....
حبيبى اوعى تموت وتسيبنى وربنا لو موتت

مش عارفه ممكن اعمل ايه
.....
اموت مين يابت هاعيش وهنتجوز ونخلف تسع عيال


اشمعنى تسعه يعنى ...


هو كده وخلاص اللى اقوله يتسمع


هنجوزهم ونخليهم يستقلو بحياتهم ونفوق احنا بقى لبعض ونعجز سوا
واول لما شعرك يبيض وتكرمشى

هاشوفلى وظوظه صغيرة واتجوز عليكى

اه علشان اخرطك وارميك للوز وربنا اموتك


لا يا حبيبى انا باهزر معاكى اللى يعرفك استحاله يفكر فى الستات تانى

عاااااااااااااااااااااااا


(ضحكه حبيبى اللى كفيله بانها تنور عتمه السنين(


قال اموت واسيبك قال يا توتا انا قاعد

ومستربع فى قلبك ونافوخك صح ولا لا يا بطتى؟

مش صح مش باحبك انا باكرهك اصلا

طب ولو اخدتى المصاصات دى

هاموووووووووت فيك يا حبيييييييييييبى .....

ايون كده اضحكى وخلى الدنيا تنور


..... اجى معاك عند الدكتور ...


لا يا توتا هاطمنك علطول متخافيش

مليش دعوة

بطلى دلع بقى

توتا زعلانه

توتا حته منى واستحاله اقدر على زعلها
هتطمنى بسرعه


اول ما التحاليل تطلع هاقولك وهتعرفى انى قرد ومش فيا اى حاجه

.......
ومن دكتور لدكتور اتعذبت يا حبيبى
واتبهدلت واتوجعت كتير

متخافيش يا توتا هابقى كويس وهاخطفك

وعارفه هنقضى شعر العسل فين
هاوديكى اسبوع شرم الشيخ يلا ابسط ياعم

هييييييييييه وهتخلينى اركب عجل يا حبيبى ايون

بس معايا بس مفيش عجله لوحدك ومفيش لحظه

تقضيها لوحدك قلبى على قلبك الاربعه وعشرين ساعه

مين قالك انى هسيبك لحظه دا انت بتحلم
.....
خدى بالك من توتا واوعى تخليها تزعل او تحزن
توتا اتخلقت علشان تفرح وبس
توتا مش هتفرح غير بيك يا حبيبى

....
عارف يا حبيبى انهم بيقولولى انك بعد الشر بعد الشر موتت

وروحت عند ربنا انا عارفه انهم بيكدبو وانك عايش وهتيجى

وهتفتح العياده والمستوصف
وهاعضك لو جبت مساعده ليك حلوة ولا صغيرة لازم تكون عجوزة
انت عارف انى باغير عليك بجنون ومبطقش حد غيرى يجى حتى

ولو لحظه فى محيط تفكيرك
....
انت ليه اخر مرة شوفتك كنت مستسلم قوى كده ؟
ليه كنت بتعاملنى كأنى مش هاشوفك تانى ؟

وليه كنت مصر اوى كده انك تدعيلى ؟
ليه كنت بتبصلى قوى وكأنك بتطبع ملامحى جواك ؟

ليه كنت بتتأملنى كده ؟
هو انت كنت ناوى تسيبنى؟

انت كنت عارف انك هتبعد عنى وهتسيبنى يا حبيبى ؟
هو انت كنت عارف ان دى اخر مرة تشوفنى فيها ؟

......
قالولى انك خفيت بعد البهدله الطويله فى العلاج
قالولى انك خفيت وانك بتاكل وبتشرب وانك عاوز تشوفنى
هما كانو بيكدبو عليا ؟
هو انت روحت عند ربنا بجد؟
هو انا خلاص مش هاشوفك تانى ابدا ؟
ممكن تقرى الجواب وترد عليا علشان انا باموت بالبطىء

وانت مش عاوز تفهمنى ايه حصل؟
انا هاستنى انك ترد عليا او تدعيلى اجى عندك زى
ما كنت بتدعيلى بالسعاده
انا واثقه ان دعوتك دى هتستجاب يا حبيبى


ادعيهالى



انتهت


عشرون عاما وفقط

By ليس فقيرا من يحب on 7:33 م

التعليقات (40)

Filed Under:






عشرون عاما



هى المده التى ازعم انى احتاجها حتى اتمكن من البوح بمكنون صدرى دون


دون خوف من النتيجه ودون الشعور بالحرج الذى سيغلفنى ان بوحت الان

*
فقط عشرون سنه



احتاجها لاخبرك انى تعذبت عذابا فاق احتمالى



وانت تتسرب من بين يدى


ولاخبرك كم كنت اتمزق حزن وحسرة وغيرة



فى كل مرة اتيت لتخبرنى عنها


وكم عانيت وانا الملم شتات نفسى الحائرة
*
ساحتاج عشربن عاما



لاخبرك كم مرة فكرت فى الابتعاد وكم مرة حاولت


اجهاض حبك كطفل مكتمل

كنت دائما بحياتى نزيف لا ينتهى


والم لا يتوقف


اصبحت حياتى تشبه الموت كثيرا


اتعرف كم جلدت نفسى وقسوت عليها كى تفيق وتشفى منك


وكم حاولت مرارا وتكرارا ان افتح قلبى واكمل طريقى

وفى كل مرة كانت النتيجه الحتميه هى الفشل



*
اكثر من عشرين عاما



احتاجها الان لاخبرك كم احببتك وكم تمنيتك


وكم تاق قلبى لاحتضانك والاختباء بين اضلعك



فى كل مرة رأيتك فيها


اتدرى انى عانيت كثيرا وانا احاول التماسك والتظاهر بانى صلبه


وقويه فى وقت كنت اضعف فيه من ان اتحمل


وكم صفقت لنفسى بشده



ولم لا اصفق لها وهى تبدع فى التماسك


ابداعا فاق كل ابداع


لما لا انحنى لها دهشه وهى تمتلك


مواهب غير عاديه فى لعب دور القويه التى لاتهزم ابدا


فلتصفق معى وتهنئنى على نجاحى الباهر


ولتدعمنى


فقط لكى اواصل


*


*


*



بعد عشره اعوام وعشرة اخرى سا خبرك انى


احبك


............................................................................


يلا بوست رومانزى قبل رمضان اهو واياكم حد ينشنى عين على نشاطى ده


بوستين فى يومين ورا بعض اهو كح كح ههههههههههه



كل سنه وانتم بالف سعاده وراحه بال وبعوده الايام


اقعدو بالعافيه


بخخخخخخخخخخخخخ

By ليس فقيرا من يحب on 3:02 م

التعليقات (29)

Filed Under:




السلام عليكم
ايها الشعب
ايها الاصحاب
ايها العيال
افرحووووو ارقصووووووووووووو
وفرقعو الصواريخ فى سماء البلوجر

انا جيت من تانى بعد ما غياب طويل عن مدونتى اللى زى ما يكون حد عاملى عليها عمل
لا طيقاها ولا طايقه افتحها بس انا هاجبيب هذوكا المؤذى من قفاه بعون الله
واحب اطمنكم احنا عملنا زار وطفشنا العفاريت وجيييت
بعد ما مشيت كل مقاطيم الرقبه والاشكال المنيله على عينها اللى كانت قارفه الواحد فى عيشته
اصلى ِمكنتش عارفه اجى قبل ما امشيهم ^_^
اينعم همو مش مشيو قوى يعنى بس اهو نص العما بقى
ومع ان ناس كتير شايفه ان الثورة منجحتش وان مفيش ايتوها حاجه اتغيرت الا
انى متفائله جدا وحاسه ان الخير جاى باذن الله
من انهو اتجاه بقى مش عارفه بصراحه

تقولولى ليه بتقولى كده هاقولكم اهو مجرد احساس مع ان الدنيا بايظه
بايظه بايظه ودماغى ورمت من كتر الاحداث البشعه والغباء
اللى بيحصل ده
واوقات كتير الواحد بيحس انى تيتى تيتو وزى ما روحتو التحرير زى ما جيتو
اصل انا ما نزلتش بس كنت مع الثورة قلبا وقالبا حتى لو من تحت اللحاف
حتى لو كنت خلاص كنت قربت ابث وعنايا تتعمى من كتر
البحلقه فى التليفزيون وع النت
انا مبسوطه قوى انى عاصرت الفترة دى بكل احداثها الحلوة والقاسيه
ومعاصرتى للثورة هتدينى مساحه كبيرة للفشر على
عيالى باذن الله يكفى انى اقولهم ان امكم كانت ثورجيه قديمه

هههههههههههههههه

وكانت شاهده بذات نفسوياتها على نفاق وغباء وتحول
ناس كتير قوى
وهاسمعهم فيديوهات باسم يوسف ونقعد نضحك اوى


ونحزن كمان

ايييييييه ايام
يلا بقى المهم انكم وحشتونى وجيت اقولكم خلونا ننشط شويه
متشمتوش الفيسبوك فى البلوجر

وعلى فكرة بنتى حبيبتى ومدونتى ليس فقيرا من يحب



تمت خلاص السنتين وعليهم شهر كمان

كل سنه وانتى طيبه يا مدونتى وحقك عليا علشان اهملتك




مع انك عرفتينى بناس استحاله كنت اعطر فيهم فى حياتى
سامحينى بقى يلا
هاااااااااااا


صااااااااااااااااااااااااااااااافى يا لبن
هيييييييييييييييييييييييييييييييييييييه
هييييييييييييييييييه
مدونتى صالحتنى

كل سنه وانتو طيبين يا عيال بعوده الايام
اوعو تنسونى من دعواتكم
ومحدش يزعل منى لو مقصرة معاه
وارجع واقولكم افرحووووووووووو ارقصووووووووو






وبعدها اقعدو بالعافيه

ياااااااااااارب مصرنا

By ليس فقيرا من يحب on 7:15 م

التعليقات (18)

Filed Under:







يااااااااااااااارب تحفظ مصرنا وتحافظ عليها وتحمى شبابنا

ياااارب احميهم وبارك فيهم يااااااارب

ياااااااااارب اجعل كيد الظالمين فى نحورهم

اللهم انى استودعتك بلادى

اللهم انا نستودعك بلدنا مصــر فلا تفجعنا ولا تسؤنا فيها يــــــــــــــارب

ياااااااااااااارب تكونو جميعا بالف خير وكل حبايبكم يارب

ربنا يطمنا على مصر وعلى كل اخواتنا وحبايبنا



رحل عام واتى عام

By ليس فقيرا من يحب on 9:44 م

التعليقات (16)

Filed Under:




لملم عام 2010 أوراقه ورحل منذ ساعات
تاركا خلفه احزان لا تنتهى

وألم فوق الاحتمال تاركا خلفه معذبون كثيرون وحيارى اكثر تاركا اخوانى

واولادى فى غزة معذبون محاصرون بالجدر والاسوار ما ذنب اطفالى

فى فلسطين سيرحل العام ويتركهم غارقين فى همومهم واحزانهم وحاجتهم

كأعوام كثيرة مرت مرت يعيشون فى ظلم وقهر

اقف عاجزة امام حاجه وقهر اطفالى

لا استطيع ان اداوى جراحهم

لا استطيع ان احطم رأس الاحتلال

لا استطيع ان افعل شيىء

لا استطيع سوى ان اصرخ صرخه العجز

يالله انصر اخوانى فى فلسطين وفى كل مكان

فرج كربهم وكربنا اقض حوائجهم واجعل كيد اعدائهم واعدائنا فى نحورهم

رحل العام وبدأ عام جديد

جالبا معه عذابات لا تنتهى وفتن لا تعد ولا تحصى ومحاولات شتى

لتفتيت وحدتنا وتشتيت شمل مصرنا الحبيبه

البقاء لله رحم الله اخواننا من المصريين مسلمين ومسيحين

ولعن الله كل من ايقظ الفتنه

فقط لنعمل عقولنا ولنفكر سويا لمصلحه من هذا الاحتقان الحادث

الان ؟ ولمصلحه من العزف على وتر الدين واشعال الفتنه الطائفيه ؟

فى النهايه انها مصرنا مصرنا جميعا لنفق قبل ان نلحق بركب دول فتتتها نار الفتنه

والقائمه بها الكثير والكثير

كم اشعر بالاسى والحزن

يقتلنى احساسى بالعجز



رحل العام وبدأ عام جديد

عام وبرغم بدايته الحزينه جدا الا اننى اطمع فى ان يكون عام دافىء

تكافئنا فيه السماء بعطاياها وتهب لنا راحه البال والسعاده

امطرتنى امى بالقبلات و بالدعوات وتمنت كثيرا

ان تحمل سنه 2011 بطياتها الفرح لى ولاخوتى ولكل محروم

اخبرتنى امى انا رقم 11 رقم على حد قولها( مفتوح ومنه للسما

وهيكون فيه خير كتير ومش هيكون ابدا زى رقم 9 او 0 او الارقام المقفوله دى )

ها انا انتظر يا امى واعلم ان الخير قادم لا محاله فيكفينى قول رب العزة

(انا عند ظن عبدى فليظن بى ما شاء )

وانا اظن ان الخير قادم باذن الله

كل عام وانتم الى الله اقرب



 

template By: Free Templates