رساله لن تصل ابدا

By ليس فقيرا من يحب on 9:56 م

Filed Under:





فاكر يا حبيبى اول مرة شوفتك فيها كنت انا لسه رايحه اولى ثانوى

وانت فى سنه تالته فاكر وانا نازله السلم لما اتشنكلت وقعت على

وشى وكل الصبيان والبنات اللى ع السلم قعدو يضحكو الا انت

طلعت جرى وخدتنى من ايدى وساعتها كانت رجلى بتوجعنى قوى

بجد ومكنتش قادرة امشى قولتلى لو كنتى رفيعه شويه كنت شيلتك

بس الجدعنه مش هتنفع الوقت ده وقعدنا نضحك قوووووى
كنت مكسوف تسندنى او حتى تمسك ايدى
فاكر لما ناديت على واحده زميلتى قولتلها ممكن تسنديها

بس لحد الزائرة الصحيه
وفضلت ماشى معانا ورحت اشتريتلى رباط ضاغط الممرضه

ربطت بيه رجلى

اهو الرباط الضاغط ده كان اول شرارة قصه الحب بينا


كل شويه اجيب التلاته جنيه ونص بتوع الرباط واجى انادى عليك

خد تمن الرباط تقعد تضحك وتقولى يلا جرى على الفصل

بصراحه انا كنت بافرح لما مش ترضى تاخد الفلوس علشان

الاقى حجه اكلمك بيها مرة تانيه وبصراحه كمان انا كنت واخده

بالى قوى انك بتفضل ماشى ورايا لحد ما اركب العربيه
واصلا كنت باشوفك الصبح وبابقى عارفه انك قاعد مستنينى لما اطلع
طب اقولك سر لو كنت يوم مش لاقيتك قاعد مستنى كنت بادايق قوى

واحس ان اليوم كده انضرب
وسر كمان انا كنت باعمل نفسى مش واخده بالى خالص

مع انى كنت واخده بالى جدا من كل حركه بتتحركها

وكل بصه بتبصهالى فى الخباثه وكنت بافرح من قلبى قوى ومعرفش ليه
من اول يوم شوفتك وانا حسيت انى هيكونلى معاك حكايه كبيرة

كنت واد دحيح جايب 98 ونص فى سنه تانيه

وعمال تقرقض فى ضوافرك من كتر المزاكرة وتخيل
يا حبيبى انك كنت انت الوحيد تقريبا فى الصبيان بتوع المدرسه

كلهم اللى بتروح بالشنطه ومعاك كتبك وكشاكيلك كان كل المدرسين

بيحبوك قوى وبيضربو بيك المثل فى كل فصل ويقولو قد ايه انت

طالب مهذب وملتزم وشاطر
مرة سرقت كشكول التعبير بتاعك من مدرس العربى وذهلت لما شوفت

روعه خطك واسلوبك فى الكتابه خطك كان حلو قوى يا حبيبى ومترتب قوى

عارف انى فريت الكشكول ورقه ورقه مش عارفه ليه بس قعدت اصفح

وفعلا لقيت اللى قلبى بيدور عليه وشوفت اول قلب مقسوم وفيه
اول حرف من اسمى واسمك مش عارفه ليه كنت متأكده انى انا المقصوده

ويومها وشى احمر قوى وحطيت الكشكول بسرعه ورحت قعدت فى التخته بتاعتى

ودفنت راسى بين ايديا وقعدت اعيط


احنا كنا حاسين بعض قوى وقعدنا نص السنه مكتفيين بالنظرات

لحد انت ما استجمعت قوى الشجاعه بتاعتك كلها وكتبتلى جواب

وخبيته فى الاكلاسير بتاعى مكنش فيه غير كلمتين بحبك وبس
ونفس القلب المقسوم اللى شوفته فى كراسه التعبير ورجعت تانى

بعد الجواب ده تكتفى بالنظرات
انا مقدرة قوى يا حبيبى قد ايه كان صعب عليك تعمل كده

وانت كل الناس عارفه عنك الالتزام وانك
مش بتاع بنات ولا تسالى انا كنت عارفه ومتأكده انك احسن

واحد فى العالم انا حبيتك قوى وحسيتك قوى قوى


وفاكرة قوى اخر يوم فى امتحانات السنه كنت انت قاعد مستنى

قدام المدرسه لقيتك جاى عليا ولاول مرة احس انك مش مكسوف

منى ولا مرتبك زى عادتك
وقولتلى انا باحبك هتستنينى ؟ ....

فاكر انا رديت عليك قولتلك ايه .....
طب خد الفلوس بتاعت الرباط وقعدنا نضحك وسط خجل

وكسوف وارتياح وقلق ومشاعر كتير قوى متلغبطه
ما انت كنت عارف الرد يا اهبل دنا ما صدقت انك نطقتها

دنا لولا الملامه وكسوفى واحراجى من انى واقفه باكلم ولد

فى الشارع كنت اترميت فى حضنك وفضلت اعيط
....
وخلصت السنه وانت جبت 98 وقدمت فى طب بشرى

مع انك كنت عاوز تروح اداب قسم صحافه
طول عمرك طيب يا حبيبى اتكسفت حتى تقول لابوك

انا نفسى ادخل كليه تانيه غير الطب ولاقيته ملهوف
ان ابنه يكون دكتور وجيت على نفسك علشان تسعده
طول عمرك عايش بس علشان تسعد قلوب الناس وتفرحها
وعدت الايام

....
وفضلنا بردو نحب بعض من بعيد لبعيد وكنت باشوفك وانت

واقف مستنينى عنددرس الكيميا والفرنساوى وكل فين وفين

لما نلاقى فرصه نتكلم فيها تلت اربع دقايق كنت بتقضيهم نصايح

ذاكرى كويس يا توتا ركزى فى الكيميا الفرنساوى منخسرش فيه ولا درجه
اوعى تنسى الاكسونات يا توتا الاكسونات عليها درجات

الكيمياء العضويه سهله بس حبيها
الماده يا توتا هتحبيها هتحبك وتديكى اعلى درجه ....


وفى وسط النصايح دى

كنت بتطلع كيس المصاصات والشوكلاته تحطهم فى شنطتى
انا بصراحه كنت باعمل نفسى مش واخده بالى علشانك

كنت بتتكسف اوى لما تجيبلى مصاصه
مع انى كنت بافرح اووووى كل لما تفتكر الحاجات اللى باحبها وتعملها
انا عارفه انى رغايه قوى يا حبيبى طب ما انت فاكر كل المواقف دى

من غير ماحكيها بس انا عاوزة احكيهالك عاوزة افضل ارددها

اصلى بافرح اوى وانا باحكيها يا حبيبى

يا حبيبى يا حبيبى يا حبيبى


ما انت عارف انى باحب اقولك يا حبيبى علطول
فاكر لما كنت تيجى من الكليه وتقولى مبحبش الدراسه

خالص يا توتا انا نفسى احول من الكليه وانا اقولك لا يا حبيبى

دانا مش عارفه اتخيلك غير وانت دكتور اد الدنيا

وتقولى انت هو فى دكتور بيخاف كده من منظر الدم وانا اقعد اضحك

واقولك فشر دا انت دكتور زى القمر وتتكسف وتضحك وانا اتكسف واضحك
كنت عارفه انك رقيق قوى بس بردو كنت عارفه انك هتتفوق رغم كل الظروف


طب فاكر قد ايه كنت باكره الفيزيا وانت تقولى انا باحب الفيزيا يبقى

لازم تحبيها ياتوتا اشمعنى انا حبيت المصاصات والشوكلاته زيك
شدى حيلك وادخلى طب انتى كمان وهنتفتح عيادتنا سوا

وهنعمل يومين فى العياده بنص الكشف بس
وهنفتح مستوصف لاهل البلد ومش هناخد منهم اى فلوس يا توتا
اوعى يا توتا لما تكبرى تتغرى وتنسى الناس الطيبه
اوعى يا توتا الدنيا تلهيكى عن ربنا او عن صلاتك
فاكر لما اتفقنا نحفظ القرءان وانا مصرة نحفظ من

جزء عم وانت مصر نحفظ من سورة البقرة
فى الاخر محبتش تزعلنى وبدأنا من جزء عم

وكل لما احفظ سورة تجيبلى كيس مصاصات كبير


ياه يا حبيبى انت كنت رقيق كده ازاى


كل لما كنت اقولك انا مش عارفه ليه خايفه من اللى جاى

تقولى لا يا توتا اللى جاى فى ايد ربنا وربنا مبيعملش لينا

غير الخير حتى لو فى الظاهر بتاعه شر
ارمى حمولك على ربنا ومتخافيش

مش هاسيبك ابدا يا توتا
كنت بتطمنى قوى يا حبيبى كنت باحس بالامان

وعمرى ما خوفت لحظه وانت جنبى
..
فاكر لما رحت جيبتلى نتيجه الثانويه ولاقتنى مجموعى

نزل قوى ومش نافع خالص ادخل اى كليه فى المرحله الاولى

قولتلى كده انتى هتحققيلى حلمى وهتدخلى الكليه
اللى انا كنت عاوزها ودخلت الاداب قسم صحافه يا حبيبى
وبقيت صحفيه قد الدنيا اهو وباكتبلك الجواب ده وانا قاعده على مكتبى
فى جريده محترمه قوى واوعى تقول ان اللغه اللى انا باكتبلك بيها

الجواب ركيكه وانى صحفيه فاشله
لا يا حبيبى انا باكتبلك كده علشان انت حبيبى

وباخرج الكلام من قلبى على الورقه علطول

ياااااااااه انت ليك ذكريات كتير قوى معايا يا حبيبى


توتا عاوز اجى اتقدم بقى


لا يا حبيبى ابويا مش هيجوز الصغيرة قبل الكبيرة


يا توتا عادى منا لسه هاخلص كليتى وانتى هتخلصى

كليتك تكون الامور بقت احسن

لا يا حبيبى اصبر بقى وبعدين هتروح منى فين انا قاعده على قلبك

يا حبيبتى انتى بتجرى فى دمى
وبتروحى مع الدم على القلب بس مبتخرجيش تانى
توتا هاتقدم واللى يحصل بقى


كده هتضيع الفرصه لو اترفضت المرة دى اصبر

باحبك ....
بادوب فيك
....
حبيبى اوعدنى تروح للدكتور ومتستناش على الصداع ده
علشان خاطرى روح للدكتور يا دكتور
انت حالك مش عاجبنى انا مش هاسكت على تعبك ده يا تروح للدكتور
يا والله العظيم هاروح لابوك اقوله ونكتفك ونوديك غصب عنك
....
باحبك حتى وانتى هبله باحبك بجنون والله
.....
حبيبى اوعى تموت وتسيبنى وربنا لو موتت

مش عارفه ممكن اعمل ايه
.....
اموت مين يابت هاعيش وهنتجوز ونخلف تسع عيال


اشمعنى تسعه يعنى ...


هو كده وخلاص اللى اقوله يتسمع


هنجوزهم ونخليهم يستقلو بحياتهم ونفوق احنا بقى لبعض ونعجز سوا
واول لما شعرك يبيض وتكرمشى

هاشوفلى وظوظه صغيرة واتجوز عليكى

اه علشان اخرطك وارميك للوز وربنا اموتك


لا يا حبيبى انا باهزر معاكى اللى يعرفك استحاله يفكر فى الستات تانى

عاااااااااااااااااااااااا


(ضحكه حبيبى اللى كفيله بانها تنور عتمه السنين(


قال اموت واسيبك قال يا توتا انا قاعد

ومستربع فى قلبك ونافوخك صح ولا لا يا بطتى؟

مش صح مش باحبك انا باكرهك اصلا

طب ولو اخدتى المصاصات دى

هاموووووووووت فيك يا حبيييييييييييبى .....

ايون كده اضحكى وخلى الدنيا تنور


..... اجى معاك عند الدكتور ...


لا يا توتا هاطمنك علطول متخافيش

مليش دعوة

بطلى دلع بقى

توتا زعلانه

توتا حته منى واستحاله اقدر على زعلها
هتطمنى بسرعه


اول ما التحاليل تطلع هاقولك وهتعرفى انى قرد ومش فيا اى حاجه

.......
ومن دكتور لدكتور اتعذبت يا حبيبى
واتبهدلت واتوجعت كتير

متخافيش يا توتا هابقى كويس وهاخطفك

وعارفه هنقضى شعر العسل فين
هاوديكى اسبوع شرم الشيخ يلا ابسط ياعم

هييييييييييه وهتخلينى اركب عجل يا حبيبى ايون

بس معايا بس مفيش عجله لوحدك ومفيش لحظه

تقضيها لوحدك قلبى على قلبك الاربعه وعشرين ساعه

مين قالك انى هسيبك لحظه دا انت بتحلم
.....
خدى بالك من توتا واوعى تخليها تزعل او تحزن
توتا اتخلقت علشان تفرح وبس
توتا مش هتفرح غير بيك يا حبيبى

....
عارف يا حبيبى انهم بيقولولى انك بعد الشر بعد الشر موتت

وروحت عند ربنا انا عارفه انهم بيكدبو وانك عايش وهتيجى

وهتفتح العياده والمستوصف
وهاعضك لو جبت مساعده ليك حلوة ولا صغيرة لازم تكون عجوزة
انت عارف انى باغير عليك بجنون ومبطقش حد غيرى يجى حتى

ولو لحظه فى محيط تفكيرك
....
انت ليه اخر مرة شوفتك كنت مستسلم قوى كده ؟
ليه كنت بتعاملنى كأنى مش هاشوفك تانى ؟

وليه كنت مصر اوى كده انك تدعيلى ؟
ليه كنت بتبصلى قوى وكأنك بتطبع ملامحى جواك ؟

ليه كنت بتتأملنى كده ؟
هو انت كنت ناوى تسيبنى؟

انت كنت عارف انك هتبعد عنى وهتسيبنى يا حبيبى ؟
هو انت كنت عارف ان دى اخر مرة تشوفنى فيها ؟

......
قالولى انك خفيت بعد البهدله الطويله فى العلاج
قالولى انك خفيت وانك بتاكل وبتشرب وانك عاوز تشوفنى
هما كانو بيكدبو عليا ؟
هو انت روحت عند ربنا بجد؟
هو انا خلاص مش هاشوفك تانى ابدا ؟
ممكن تقرى الجواب وترد عليا علشان انا باموت بالبطىء

وانت مش عاوز تفهمنى ايه حصل؟
انا هاستنى انك ترد عليا او تدعيلى اجى عندك زى
ما كنت بتدعيلى بالسعاده
انا واثقه ان دعوتك دى هتستجاب يا حبيبى


ادعيهالى



انتهت


64 التعليقات for this post

يا نهااااااااااارى
حرام عليكى انا عمالة اعيط اصلا
بجد حلوة جدا جدا جدا بقه
عجبنى تمسكه الشديد بيكى بعيدا عن اى ظروف حواليه
عجبنى طريقة تعبيركو لبعض عن حبكو
كانت بسيطة بس بتحمل معانى كتير ورقيقة اوى بجد اصلا
ربنا يجمعكو على خير فالدنيا والاخرة :(

Posted on 21 سبتمبر 2011 في 10:53 م  

طبعا البداية دمها خفيف اوي وموتتني ضحك
لكن بعدين نغمة الرومانسية بدأت تطغى على البوست وتتعالى شوية شوية وده دخلنا في جو الحلم والرسالة بتاعتك
بوست يأسر القلوب
واحلى الكلام هو اللي من غير ترتيب
احساس صافي
تسلم ايدك يا رانيا
بجد بوست من اروع ما قرات

Posted on 21 سبتمبر 2011 في 11:00 م  

مااااشى يارانيا ..ماشى
لما أنا ضحكت ودمعت وبعدين عيطت من قبل مايتعب اصلا ..ربنا يسامحك :(

وأنا فاكراها نوستالجيا وكنت هاقولك جاتنا نيلة فى حظنا الهباب ..ايه اللى ودانى ثانوى بنات ..مالها المدارس المشتركة

حلوة قوى حكاية الرباط الضاغط والتلاكيك وكشكول التعبير وانها تعمل نفسها مش واخدة بالها ؛)
تقريبا كده البنات نسخة واحدة :)

أنا هاعمل نفسى مش واخدة بالى خالص من أول مابدأ يتكلم عن الصداع

تسلم الايادى ياحبيبتى

Posted on 21 سبتمبر 2011 في 11:07 م  

السلام عليكم
مش عارف اعلق اقولك ايه
روعة فى كتابتك وكلامك واحساسك
ربنا يقدر الخير ويكتب الخير ويوفق للخير
دومتى بخير

Posted on 21 سبتمبر 2011 في 11:15 م  

ماعنديش اي تعليق
:
اي تعليق لن يرق الي ماسطرتية هنا

Posted on 21 سبتمبر 2011 في 11:28 م  

قصه حلوه جداااااااااااا وتوجع جدا جدااااااااا :(

Posted on 21 سبتمبر 2011 في 11:50 م  

تعرفى بقى أنى بقاوم العياط
وإنك شاطرة أوى فى الوصف
وأنى كنت قلقانة لتكتبى حاجة ظريفة فى الآخر كعادتك وتطلعينى من المود:)

بجد يا رورو تحفة

Posted on 22 سبتمبر 2011 في 12:23 ص  

مش عارفه اقولك ايه يعنى بيقولها توتا وقولت عادى تشابه اسماء قالها بطتى وده اسم الدلع بتاع اقرب الناس ليا قولت مافيش مشاكل
لكن كمية الدموع اللى فى عيونى اعمل فيها ايه

مش عارفه اقولك الرساله حلوه او وجعتنى او اثرت فيا مش عارفه

زهراء

Posted on 22 سبتمبر 2011 في 12:38 ص  

ربنا يسعد قلبك بكل خير ويسعده بالجنة ان شاء الله .. مش عارفة كان المفروض اقرأ البوست ده ولا مقرأهوش ... مش هعرف انام... ساعات اتمنى البوست ده ميكونش بجد وساعات احس انه لو بقى بجد يبقى الدنيا كان لسة عايش عليها ملايكة دعواتك ليه هو مش محتاج غير دعواتك ياقلبي

لولا

Posted on 22 سبتمبر 2011 في 1:22 ص  

رانيا.. مين قال ان الرسالة موصلتش؟ لأ الرسالة وصلت وفهمها ومبسوط بيها بس هو مش عاجبه انك مهملة في صحتك ومش فرحان على حزنك هو بيحب يشوف دايماً ابتسامتك
كملي مشروع حفظ القرآن لانه هيكون في ميزان حسناته وهتفرحي قلبه
كل يوم 3 مرات سورة الاخلاص واهديهاله... يمكن هوه مش هيقدر يجبلك مصاصة دلوقتي ... لكن انتي تقدري تجبيله اجمل هدية وتدهاله ... القرآن الكريم ... هيفرح قوي بيها

لولا

Posted on 22 سبتمبر 2011 في 1:26 ص  

جبارة بدون مبالغة عيني كانت بتاكل السطور .. قصة جميلة جداً .. أليمة جداً

تحياتي

Posted on 22 سبتمبر 2011 في 4:29 ص  

كل شىء نصيب
حنـعمل أيه بقى؟
تدوينة جميــلة لـكن
حززززززززززززينة

Posted on 22 سبتمبر 2011 في 6:06 ص  

منك لله يا رانيا يا شيخه على الصبح هو انا ناقصه يلا روحى بقى

Posted on 22 سبتمبر 2011 في 8:58 ص  

لوزا

هههههههه انا كمان من ساعه ما كتبتها وانا عماله اعيط بس تقريبا لو البطل كان مات زى ما الحدوته بتقول يبقى مش هينفع يتجمعو تانى فى الدنيا ^_^
احمل وارق المعانى هى ابسطها يا حبيبتى

ربنا يسعدك ويفرحك انتى الاحلى

نورتينى بجد

Posted on 22 سبتمبر 2011 في 9:20 ص  

د مصطفى

منا استغربت بردو عمال تضحك ققولت ايه الراجل ده بقى البوست بحزنه مأثرش فيه هههههههه
هى كده حياتنا حبه ضحك وحبه حزن وحبه دهشه وحبه نسيان وبيمشى الحال
الاروع هو مرورك يا دكتورنا الطيب

اسعدك الله

Posted on 22 سبتمبر 2011 في 9:22 ص  

رشا

هههههه انتى قلبك رقيق زى الندى يا حبيبتى
وكفيل انو يحس الكلام من قبل ما يتكتب

اه طبعا البنات كلها نغمه واحده غيرشى انا اللى فقر وكنت مشغوله فى المزاكرة ههههههه

ربنا يسعدك يارب يا حبيبتى ويفرح قلبك الطيب ويراضيكى

انا باحبك يابت

Posted on 22 سبتمبر 2011 في 9:25 ص  

ابو معاذ

وعليكم السلام ورحمه الله وبركاته

ازيك يا محمد متقولش حاجه

الاروع هو مرورك هنا يا حمايا

ربنا يخليك ويسعدك ويجعلى من دعواتك نصيب
نورتنى جداااااااااااااااا

Posted on 22 سبتمبر 2011 في 9:26 ص  

شموسه

مجرد انك تيجى هنا وتقرأى كلمه واحده ليا
كفيل بانو يوصلنى الى عنان السما يا غاليه

اسعدك الله

وحشانى خالص

Posted on 22 سبتمبر 2011 في 9:28 ص  

ريس قلم

الاجمل من قصتى الموجعه هو مرورك

هنا يا فخامه الرئيس

ربنا يسعدك ويفرح قلبك ويقر عنيك بكل

ما تتمناه

نورتنا يا فندم

Posted on 22 سبتمبر 2011 في 9:29 ص  

موناليزتى

انا فعلا حسيت ان الكلام الظريف اللى باكتبه فى اى بوست بيطغى على الموضوع المكتوب والناس بتنشغل فيه وتنسى الكلام الاصلى هههه فعملتلكو كمين المرة دى ومفيش كلمه بره البوست
الف بعد الشر عنك من العياط يا غاليتى
ربنا يسعدك ويفرح قلبك ويعوضك كل خير

الاجمل من البوست هو مرورك الطيب

نورتينى يا موناليزتى

Posted on 22 سبتمبر 2011 في 9:32 ص  

زهرتى

يارب ما تتوجعى ابدا ولا تشوفى اى شر

انا كمان مش عارفه ليه حالتى النفسيه بتسوء
باحاول اتغلب على ده بس مش عارفه بقى ههههه

لو فى حاجه حلوة هتبقى مرورك هنا يا طيبه

وحشتينى قوى يا طماطم باحبك

Posted on 22 سبتمبر 2011 في 9:35 ص  

لولا

تعليقاتك جميله قوى وبتشوفى الحاجات من منطق حلو جدا
صحيح ان الدنيا فيها بين البشر ملايكه بقلبهم وباحساسهم يمكن تايهين فى وسط الزحمه والمصالح والماديات لكنهم موجودين
والجزء الاكبر منهم مبينفعش يكون عايش فى وسط خداع وزيف البشر فربنا فبيفضل انو يكون فى جنات النعيم

ربنا يسعدك يا حبيبتى ويفرحك

نورتينى جدا يا لولايتى

Posted on 22 سبتمبر 2011 في 9:38 ص  

شريف

رأيك اسعدنى جدا وانبسطت ان

البوست عجبك

هى دى حياتنا فرح والم وبتعدى

اتمنى تكون بالف خير ونصك التانى كمان

ربنا يسعدكم ويفرحكم

وعودا احمد متختفيش كتير

Posted on 22 سبتمبر 2011 في 9:40 ص  

دكتورتى الجميله

عامله ايه يا قمر

الحزن فى حد ذاته حاله انسانيه جميله

ممكن الناس تتعايش معاها وتستمتع بيها جدا

اسعدك الله يا حبيبتى

نورتينى بشده

Posted on 22 سبتمبر 2011 في 9:41 ص  

قطتى

ههههههههههه انتى زى العسل وانا اصلا مبموتش فيكى من قليل

يا ام عيون مسهوكه

والله باحبك ياوليه

منورة الدنيا

Posted on 22 سبتمبر 2011 في 9:42 ص  
غير معرف

مش عارفه اكتب كومنت جايز عشان رد فعلى كان انبارح بالليل لما قريتها
دمووووووووع
وجعتى قلبى يا رونى

Posted on 22 سبتمبر 2011 في 10:00 ص  

واجعتيلى قلبى

لأبعد ما تتخيلى

بعد ما قلت النهاية هتكون سعيدة

):

Posted on 22 سبتمبر 2011 في 10:33 ص  

ايمى

انتى رقيقه كده ليه ياوليه

اخشوشنى شويه كده

ههههههه

الف بعد الشر عنك من الدموع يا حبيبتى

ربنا يسعدك ويفرحك

لوولو وحشتنى قوى غيظيها بقى ان الاهلى خسر

نورتينى يا حبيبتى

Posted on 22 سبتمبر 2011 في 10:37 ص  

رامى

الف بعد الشر عنك من وجع القلب

الحياه دايما مش بتدينا اى نهايات سعيده

لو كانت نهايتنا سعيده كنا بقينا فى الجنه

مش على الارض

يارب تكون بالف خير

مش عاجبنى خالص يارامى يارب ربنا يسعدك وييسرلك كل امورك

نورتنى جداااا

Posted on 22 سبتمبر 2011 في 10:39 ص  
غير معرف

بجد يارونا القصه دى جامده اوى اوى ومليانه احساسيس مختلفه حب وشوق وانتظار ولهفه وحزن وحب بس انا اللى محيرنى هو الرباط الضاغط كان وقتها ب 3جنيه ونص ولا 3.75

Posted on 22 سبتمبر 2011 في 12:04 م  
mahmoud abdo

بجد يارونا القصه دى جامده اوى اوى ومليانه احساسيس مختلفه حب وشوق وانتظار ولهفه وحزن وحب بس انا اللى محيرنى هو الرباط الضاغط كان وقتها ب 3جنيه ونص ولا 3.75

Posted on 22 سبتمبر 2011 في 12:07 م  

ايه البوست التحفه ده
حرام عليكى يا شيخه انا عيط مش قادره ابطل
اسلوبك جميل جدا
عشت معاه
وحسيت بأحدثه
بجد انا مش متخيله ان فى حد ممكن يعيش احداث قصة حب زى دى
ده هيتوجع قوى
ياااربى
بجد اتخنقت وبكيت واتأثرت قوووى

Posted on 22 سبتمبر 2011 في 6:26 م  

ايه البوست التحفه ده
حرام عليكى يا شيخه انا عيط مش قادره ابطل
اسلوبك جميل جدا
عشت معاه
وحسيت بأحدثه
بجد انا مش متخيله ان فى حد ممكن يعيش احداث قصة حب زى دى
ده هيتوجع قوى
ياااربى
بجد اتخنقت وبكيت واتأثرت قوووى

Posted on 22 سبتمبر 2011 في 6:26 م  

مش لاقي كلام اعلق بيه
و اللهي ما لاقي

Posted on 22 سبتمبر 2011 في 7:15 م  
غير معرف

عالرغم اني مش فاكر حاجه من اللي قرأته
إلا ان معلقه معايا المصاصات اوي وممكن ابقي اجيب كيس واديك واحده هههههههه

Posted on 22 سبتمبر 2011 في 8:10 م  
أزال المؤلف هذا التعليق.
Posted on 22 سبتمبر 2011 في 9:54 م  

ولانها كانت زيارتى الاولى لمدونتك..وكان مكتوب عليا انى اذ فجأة اصحى من النوم فى غير ميعادى واذ فجأة برده اول حاجه اشوفها وتقع عينى عليها البوست ده..كل اللى هقدر اقولهولك ( ربنا يسامحك) :(
ده وش مش حزين بس ده مفروس ومتغاظ وحاجات كتير اوى هتعرفى سببها دلوقتى

أول ما بدأت اقرأ القصة...طبعا من طريقة سردك الرائعة ماشكتش لحظة انها مش حقيقية وتعايشت معاها جدا وخصوصا ان كل تفاصيلها كانت قريبة جدا من قلبى وانا باه متعايشة جدا كده قرأت النهاية اللى كنت مقتنعة وانا بقرأها انها حقيقية...طبعا العياط والكلام اللى اتكتب فى التعليقات ولا حاجه بالنسبة للى حصلى ..مابئتش عارفه اعمل ايه جاتلى فكرة انى اصحى اختى علشان تعيش معايا المأساة...حاولت اعلق ماقدرتش.وفضلت طول اليوم حتى وانا فى شغلى مستنية علشان اطمن عليكى وانا على يقين انك صاحبة القصة او الماساة دى..
أول ما بدأت اقرأ التعليقات حمدت ربنا انك بتكتبى قصص وانها مش قصتك ولا قصة حد..وبعدين افتكرت تأثير القصة عليا طول اليوم فقررت اكتب تعليق

بعد كده يا رانيا لو سمحتى لما تكتبى قصص من النوع ده اعملى تنبيه ان ما ينفعش أصحاب القلوب الضعيفة يقرؤها او اكتبى انها مش حقيقية..علشان مايحصلش لحد اللى حصلى انهارده وتشيلى ذنبه

بعد زيارتى الاولى مش عارفه انا ممكن اجازف واقرا بوست تانى ليكى ولا لأ...ياريت تعملى جزء تانى للقصة دى علشان تكفرى عن النهاية اللى كانت هتجيب نهايتنا دى (:

مبدعة بصدق...
صادقة بابداع.....

Posted on 23 سبتمبر 2011 في 5:26 ص  

احلى ما في البوست انك ببتكلمي بطبيعتك وكاني شايف رانيا قاعده بتحكي
كتير من احلامنا بنحس انها قريبه وترجع تبعد وممكن تقرب تاني بس محدش عارف الخير فين
تحياتي على بوست يستحق التقدير

Posted on 23 سبتمبر 2011 في 5:17 م  

عندى تعليقين
انتى خليتينى ابتسم وافرح من قلبى على الحب الجميل البرىء ده اللى عشته بفرحته وخجله وغلاوته وحلاوته والحمد لله هو زوجى وابو اولادى دلوقت
وانعشتى احاسيس طيبة جدا فى نفسيتى

ونكدتى عليا وعيطيتنى وكلينكس وبتاع

تكفيرا لذنبك ده لازم قصة تانية اكثر تفاؤلا
او جزء تانى مثلا
تحكى فيه حياتها بعده وانه كان ليها زميل او قريب حكيتله بصفة الصديق واحترمها وحب فيها الاخلاص وابتدى يعوضها معنويا عن غيابه بمشاركتها اهتمامتها ومساعدتها فى عملها وانه يعمل حاجة كان بيعملها وانه يزود من عنده اهتمام بيها اكتر يشجعها على الحياة نفسها وفى يوم يعترف لها بانه بيحبها وبيحترم اخلاصها ليه وانه هيحاول دايما يكون سند ليها ويكون الحب اللى بتتمناه وانه هيصبر ولن يفاتحها مرة اخرى فى اى شىء وسيعتبر كلامه معها كانه ما كان ولو مرت سنين هو بس عايز يعرفها انه الخير دايما موجود
يتركها فى مكتبها وتبدا سلسلة الاحداث الماضية تمر فى مخيلتها يوم ما قال كذا ويوم ما عمل كذا وتفوق على حقيقة واحدة انه فعلا بيحبها
احساسها بالذنب يمنعها من ان تشعر بالر ضا او السعادة او ان فى خير ليها معاه
ترفض الفكرة فى عقلها وتمر الايام والشهور وفى احدى المرات التى كانت تزور فيه بيت حبيبها السابق وتسئل على اهله كعادتها فجأة يقول لها والده يا توتا تبتسم له لانه يعرف انها تحب هذا الاسم
يا بنتى انا شايف انه فلان بيحبك بصدق
تندهش جدا فلان مين يا بابا (بتقوله يا بابا حتى لا يحرم من سماعها بعد وفاة الابن)
فلان قريبك يا بنتى فاكرة لما زارنا معاكى مرة من سنتين دايما بيسئل علينا ويزورنا بس كان موصينا منعرفكيش
ازاى كده يا بابا متقوليش
مكنش عايزك تفتكريه بيدفعك للموافقة عليه
بس انا قررت انى لازم اقولك انى هبقى مطمن عليكى قوى معاه وهتفرحينا كلنا احنا ووالدك ووالدتك
ايه ده هو انتوا كلكوا عليا واللا ايه تقولها بابتسام مقاومة لدمعة بتنزل على خدها
تحتضنها ام حبيبها وهى تبكى وتقول ما لم تقوله منذ عامين واكثر اناكان نفسى افرح بيه واحقق له حلمه وتتجوزوا وتعيشوا معايا وولادكوا يعيشوا فى حضنى
مقدرتش احقق له الحلم ده
لكن يا بنتى نقدر نحقق له حلم تانى وهو اننا نخليكى سعيدة
تقوم من حضنها وتبعد
سعيدة ازاى عمرى ما هكون سعيدة من بعده مفيش فرحة تدخل قلبى مينفعش فرحة تدخل قلبى انا له لحد ما اموت.....


كملى انتى بقى وفرحينى وجوزيها لقريبها ويخلفوا ولد وجوزها يدخل عليها تانى يوم فى المستشفى معاه شهادة ميلاد ابنها
مسمى الولد على اسم حبيبها المتوفى ويقول لها هيبقى دكتور باذن الله

خدى الفكرة واكتبيها بطريقتك والا

البشر اللى زعلوا دول لازم تفرحيهم بقى




تعليقى بعد أن هدأت نفسى

ميزو: الحقى ماما بتعيط
ميرو: متخافش (صوت رجلين وكلام فى نفس الوقت) انت عارف ماما بقى
آه دى بتقرى قصة وباسونى من خدى ومشيوا

(صوت رجلين وكلام ) هى بتعيط ليه
تلاقيها بتقرى قصة مؤثرة انت مش عارف ماما
اصلها طيبة يا مريم دى قصة حقيقى
يا بنى لأ عادى طيب مش ماما بتعيط وهى بتتفرج على الفيلم وهى عارفة انهم بيمثلوا
مازن :اااه صحيح دى حتى بتخاف من افلام الرعب وهى عارفة ان الراجل لابس وش مخيف وبس
هاهاهاهاهاها

اتفضلى يا ستى بقيت اضحوكة

عيال معدومين الخيال صحيح

Posted on 24 سبتمبر 2011 في 1:53 م  

ضحكت :) ودمعت :((

Posted on 24 سبتمبر 2011 في 8:01 م  

السلام عليكم ورحمة الله وبركاته
بقى انا تعملى فيا المقلب ده يارانيا
ماشى
اقعد امبارح اقرا شويه واقوم
وارجع دلوقتى اكمل وبعد دا كله تموتيه يامفتريه
حرام عليكى
هو انا ناقص نكد
هتبقى انتى والعيال اللى عندى فى المدرسه
وصلاح وامه
اروح منكم فين بس
ســــــــلام
(على فكرة هى نكد بس حلوة ماتقوليش لحد)

Posted on 24 سبتمبر 2011 في 10:52 م  

من أجمل ما قريت والله من غير مبالغة تحفة تسلم ايديكي وقلبك الجميل على مشاعرك الحلوة دي :)

Posted on 24 سبتمبر 2011 في 11:57 م  
غير معرف

حرااااااااااااااااااااااااام عليك

Posted on 27 سبتمبر 2011 في 5:54 م  

حوده

هههههههههههه اضحك الله سنك يا شيخ

يعنى البوست كله ومفرقش معاك غير الرباط

كان بتلاته جنيه ونص

ولا بتلاته جنيه خمسه وسبعين هههههههههههههههههه

نورتنى جدا ياحوده

ربنا يسعدك ويفرحك ياارب

Posted on 27 سبتمبر 2011 في 10:11 م  

دكتورة نبضه

الف بعد الشر عليكى من العياط

ومن الوجع يا حبيبه قلبى

يعنى اول زيارة للمدونه كده تتدايقى

عااااااااااااا حقك عليا

نورتينى قوى يا حبيبتى

يارب كده يسعدك ويدوم التواصل بينا

Posted on 27 سبتمبر 2011 في 10:12 م  

احمد سمير

مش مهم اى كلام

كفايه بس انك تشرف المدونه وتقرأ البوست

نورتنى جداااااااااا

اسعدك الله

Posted on 27 سبتمبر 2011 في 10:13 م  

غير معرف

عالرغم اني مش فاكر حاجه من اللي قرأته
إلا ان معلقه معايا المصاصات اوي وممكن ابقي اجيب كيس واديك واحده هههههههه

انت غلس اوى يا شيخ يابااااااااااى

ههههههههههه نورتنى جدا

الا انت مين يا اخويا ؟

Posted on 27 سبتمبر 2011 في 10:14 م  

ستورى

اهلا اهلا بيكى يا حبيبتى

متتخيليش تعليقك اسعدنى قد ايه واسعدنى

انى الاقى ناس مش اعرفها ولا تعرفنى قلقانه عليا
ومتعاطفه معايا كده
يا حبيبه قلبى هى مجرد حاله ناس كتير عاشتها
حاولت قد ما اقدر ابسطها واخليها واقعيه
بس مكنتش اقصد انى اتعب اعصابكم واخليكم تحزنو

يارب ما تشوفى وجع ولا حزن ابدا
وياستى امسحى فيا الاحساس الوحش اللى حسيتيه

نورتينى جدا جدا

وعرفينى عليكى فى اقرب وقت

ماسى ماسى

حقك عليا بقى يا بطتى

Posted on 27 سبتمبر 2011 في 10:18 م  

سمسم

ازيك وازى كوين

اللى يستحق التقدير هو تشريفك الغالى

للمدونه

هى حاله والخير اكيد فى اختيار ربنا لينا

حتى لو الاختيار ده وجعنا

نورتنى جدا يا هندسه

Posted on 27 سبتمبر 2011 في 10:19 م  

مامه مازن

يا حبيبه قلبى اخص عليا بقى انا اخلى دموعك الغاليه تنزل كده

الف بعد الشر عنك من اى دموع او حزن

صعب اوى تصورك للجزء التانى بعد

قصه حب رقيقه وعميقه زى دى بس منطقى وجميل

وحقك عليا يا حبيبى اوعى تزعلى

بس مازن وميرو زى العسل شردوكى

دا انتى طلعتى نايتى خالث

هههههههههههههههههه

باحبك والله وبافرح بيكى اوى

ربنا يخليكى ليا

Posted on 27 سبتمبر 2011 في 10:28 م  

سفروته

يارب يا حبيبتى تضحكى علطول

وما تشوفى دموع ابدااااااااا

نورتينى بشده يا قمر

Posted on 27 سبتمبر 2011 في 10:29 م  

المعتصم

وعليكم السلام ورحمه الله وبركاته

ازيك يا ابوصلاح وازى الواد صلاح وماماته

الحمدلله انكم بخير خيبت ظنى وجيت اهو قبل ما صلاح يروح المدرسه

عودا احمد يا استاذنا

مبسوطه قوى برجوعك وبعدين هو اول مرة تعرف المقالب بتاعتى

هههههه حاضر مش هاقول لحد

والاحلى هو مرورك من هنا
نورتنا بشده

Posted on 27 سبتمبر 2011 في 11:22 م  

شوكلاته

انتى اجمل بكتير يا روقتى

وحشتينى خالص يابت

عودا احمد

الاحلى هو انك جيتى هنا يا حبيبه قلبى

ربنا يخليكى ليا وايون عوزاكى تعودى

وبقوة فضك من الكسل ده

Posted on 27 سبتمبر 2011 في 11:24 م  

غير معرف

ليه كده بس

كده يبقى عجبتك واثرت فى نفسياتك

جامد

ههههههههه

نورتنى جدا والله

Posted on 27 سبتمبر 2011 في 11:26 م  

يااااااااااااااااااااه

بجد رااااااااااااائعة

فكرة بوست جناااااااااان

باسلوب بجد وفعلا راااائع

طويل اوى بس ممتع جداااااا

فعلا راائع

تحياتى لحضرتك

ومستنية تعليق عندى واجابة
ويا ترى ايه المشكله اللى واجهتها فى المحادثة وهتكلم عنها فى البوست اللى جاى ؟؟؟؟؟؟

تحياتى

بجد راااااااااااائع

Posted on 29 سبتمبر 2011 في 6:07 م  

خلاص عرفت السر
و عرفت انك نفسك تتجوزي دكتور
ما تزعليش ع اللي راح هو امه دعياله انه مات موتة ربنا قبل ما ينتحر لو كان اتجوزك

نتكلم جد شويه

واضح ان اللي مكتوب بالاحساس العالي ده في شئ حقيقي في الموضوع
وواضح من صدقه انه اثر في ناس كتيرا قراوه

و ما كنتش مدرك انك بالرقه و الرومانسية دي

تحياتي

Posted on 30 سبتمبر 2011 في 7:39 م  

خلاص عرفت السر
و عرفت انك نفسك تتجوزي دكتور
ما تزعليش ع اللي راح هو امه دعياله انه مات موتة ربنا قبل ما ينتحر لو كان اتجوزك

نتكلم جد شويه

واضح ان اللي مكتوب بالاحساس العالي ده في شئ حقيقي في الموضوع
وواضح من صدقه انه اثر في ناس كتيرا قراوه

و ما كنتش مدرك انك بالرقه و الرومانسية دي

تحياتي

Posted on 30 سبتمبر 2011 في 7:39 م  

حِلوة ذكريآتِك

ربِي يسعِدكْ ي قَمر

دمتي بخير

Posted on 4 أكتوبر 2011 في 7:49 م  
E73

السلام عليكم ورحمة الله وبركاته

ايه بس داااااااااااااااااااا يا "توتا"

بجد بجد جااااااااااااااااااامدة

حرام عليكي يا شيخة دانا بجد صدقتها

بجد وبحقيقي عاشت ايدك وافكارك الله يرحمه بقى

Posted on 10 أكتوبر 2011 في 9:57 م  

اقدم لكم أجمل التهاني والتبريكات بمناسبة ذكرى رأس السنة الهجرية الجديدة فعــام مــــبارك ســـــعيد ، علينا وعليكم شـهيد ، وكل عام وأنتم ونحن بألف ألف خير ،

Posted on 27 نوفمبر 2011 في 3:20 م  

السلام عليكم ورحمة الله وبركاتة
ربنا يكرمك يارب والمسلمين
احب اذكرك بهذا اليوم
http://rasoulallah1.blogspot.com/2011/12/blog-post.html

Posted on 3 ديسمبر 2011 في 11:56 ص  
غير معرف

اسلوبك بجد رائع
Hamada Ezzo

Posted on 1 يناير 2012 في 10:23 ص  

منك لله .. حرام عليكي .. انا سايب عالم البلوجرز ليا زماااان .. واول ما قربت منه قلت اجي عندك اكل شيكولاته .. واستمتع بشوية ملبس ... الاقيكي حاطة القصة دي .. حرام عليكي .. هو انا ناقص ... بس انا عارف من نص القصة انه في حاجة هتحصل .. مفيش حاجة حلوة بتكمل اليومين دول ... بس برضه مكنتش فاكر انك قاسية كده
...
لكن برضه انت ومدونتك وحشتوني جدا

Posted on 16 يناير 2012 في 8:01 م  

.....

ياسيدى ياسيدى

داحنا بقينا نكتب قصص كمان
بس ايه النهايات المفجعه دى

حلوة ياستى

تسلم ايدك

وحمدالله على السلامه من شهر العسل
وعقبال منقول حمدالله على السلامه من الحادث السعيد الاول


تحياتى

Posted on 6 سبتمبر 2012 في 12:03 م  
 

template By: Free Templates