والله العظيم اقول الحق

By ليس فقيرا من يحب on 1:43 م

Filed Under:


بسم الله الرحمن الرحيم


جالى سؤال من اختى الحبيبه انوسه

ان شاء الله اجاوب عليه بكل صراحه


اذكر 10 اشياء صادقه فى حياتك؟

1- عيلتى الصغيره وكل فرد فيها بكل عيوبه

ومميزاته من اكبر راس لاصغر راس


2- عشقى للحلويات وكل مستلزمات الاطفال


من شوكلاته ومصاصه وايس كريم بصراحه


الحلويات دى ممكن تخرجنى من اصعبها


حاله وتنسينى اى مشكله بأمر بيها

هههههههههههههههههه طفاسه باين



ضف الى ذلك جميع انواع الشيبسى


والقلبظ والذى منه



3- باكره الظلم جدا واكتر حاجه اكرهها


انى اشوف حد قدامى مظلوم واحاول


اتدخل واساعده وفى نفس الوقت



ممكن اقبل ان حد يظلمنى ومباحولش


انصف نفسى او ادافع عنها


4- متسرعه جدا باندفع بسهوله


من غير تفكير وبخرج اللى قلبى



5- باتأثر باى حاجه بسرعه جدا جدا


وعلى قد السرعه اللى بتأثر بيها على


قد ما بانسى بسرعه برده بحس انى



عبيطه ممكن تلاقينى مكتئبه وحزينه


لاقصى درجه وفى خلال دقايق ابقى


فرحانه وبارقص واتنطط عادى جدا


6- نسايه ربنا يكفيكم شر الزهايمر

هههههههههههههههههههههههههه

والنسيان ده بيسببلى كوارث

وكمان ايديا مفشكله كل لما ادخل المطبخ

تسمع اصوات عجيبه حلل بتقع

واطباق بتتكسر


لدرجه انى واحده من امنياتى انى لما ادخل


المطبخ اهل البيت يحسوا بالهدوء اصل


الصراحه قربو يتشلوا منى ههههههههه

7- باكره الكدب باكره الكدب باكره الكد

ومش شايفه اى مبرر ليه ميقبض الروح


الا اللى خالقها


8- باتكسف جدا لدرجه انى ممكن اضيع


حقى علشان محرجه اطلبه وصعب عليا


ان احرج حد او اكسفه مع ان اى حد


ممكن يحرجنى بكل سهوله


9- عامله زى شاشه العرض كل انفعالاتى

بتظهر عليا فى التو واللحظه زعلت عنيا


تختنق بالدموع فى لحظتها فرحت باسخسخ


من الفرحه فى لحظتها برده مليت اللى


قدامى هيتاكد انى مليت وفى نفس اللحظه


10- المبالغه فى مشاعرى يعنى ببالغ فى


حزنى وببالغ فى فرحى وببالغ فى حبى فاللى

قدامى يحس انى مشاعرى بتتدلدق منى
ههههههههههههههههههههههههههه


11- لامؤاخده يعنى فيا شويه جبن بخاف


بابقى ماشيه فى الشارع ب10 عيون


وخصوصا بعد الحوادث المنيله اللى الواحد


بيسمع عنها وكمان بخاف اعدى الشارع لوحدى


وبيبقى متهيألى وانا باعدى انى اشد اى حد


من ايده واقوله عدينى والنبى لاحسن خايفه



كفايه كده بقى احسن انا فعلا لقيت عيوبى


اكتر بكتير من مميزاتى لو زودت كمان


حاجه هاقوم انتحر


باهدى السؤال ده لكل انسان يدخل المدونه


بس رجاء اقعد مع نفسك وفكر كويس


فكك من الكلام المرصوص وقول على


اصدق حاجات فى حياتك وميهمكش


سواء وحشه او كويسه المهم تحط ايدك


على سيئاتك وكمان حسناتك


90 التعليقات for this post

اجاباتك رائعه

بس احلى حاجه عجبتنى

عشقى للحلويات وكل مستلزمات الاطفال

من شوكلاته ومصاصه وايس كريم بصراحه

ههههههههههههههههههههه

تحياتى

Posted on 29 يوليو، 2009 5:40 م  

السلام عليكم
أنا قعدت أبص علي الصور اللي في المدونة ومش هعلق علي السؤال

ربنا يباركاك في أخواتك ويدوم المعروف بينكم دايما

علي فكرة أنا قاصد ما أعلقش أصلي مش بحب السؤال ده بحسه بيضطر الانسان انه يغش ويكدب

ربنا يسعدك

Posted on 29 يوليو، 2009 5:48 م  

Pink Dreams

نورتينى يا حبيتى واسعدتينى

بزيارتك ودى حقيقه فعلا

انا بحب كل منتجات الاطفال

لدرجه تعقد

تقبلى تحياتى

Posted on 29 يوليو، 2009 5:54 م  

اجابات حلوة و لذيذة
فيها كتير مشترك بس مش هاقول
غير اني برضه صعيف دام الحلويات قوي خصوصا لاشوكولاتة
و كمان ناسي قوي لدرجة تخوف

هههههههههههه

Posted on 29 يوليو، 2009 5:59 م  

احمد الصعيدى

وعليكم السلام ورحمه الله وبركاته

نورتنى بزيارتك ياشاعر بس حقيقى

لو قريت الكلام هتعرف انه مفهش تجمل

لان اصلا معظمه عيوب مش مميزات

وانا لما جاوبت على السؤال ده

كتبت فعلا حقائق فى حياتى

المهم ان حضرتك بجد نورتنى واسعدتنى

بزيارتك وانا بقى بمررلك السؤال

وعيزاك تكتب الحاجات الصادقه فى حياتك

من غير تجمل حسب وجهه نظرك وهاستنى

حضرتك

تقبل تحياتى

Posted on 29 يوليو، 2009 6:03 م  

adel

يبنى دا انت لسه صغير على

الزهايمر ههههههههههههههه

ربنا معايا ومعاك

نورتنى

فى حفظ الله

Posted on 29 يوليو، 2009 6:05 م  

بتحبى المصاصه

ههههههههههههههههههههههههههههههههه

هجبلك علبه مصاصات وانا جايه المره اللى جايه

اجاباتك راااااائعه

حنين

Posted on 29 يوليو، 2009 6:15 م  

السلام عليكم
------------

اجابات رائعه

بس والنبي تجيبيلي نص المصاصات الي هتجيلك

والا هتبقى كل اجاباتك وحشه بس بقى

تحياتي ياتفله

Posted on 29 يوليو، 2009 6:22 م  

طلباتك اوامر يا افندم

نحن فى انتظارك

ميمى واحمد

الف مبروك ولو انها هناك هتكون احسن

يلا بينا

Posted on 29 يوليو، 2009 6:23 م  

7annen

جدا يا حنين بتجننى
المشكله انى المفروض
مدرسه فاضله وبرستيجى ميسمحش
بحركات العيال دى بس هههههههههه
وربنا غصب عنى
نورتينى ياقمر
فى حفظ الله

Posted on 29 يوليو، 2009 6:48 م  

sweet angel

وعليكم السلام ورحمه الله وبركاته

ازيك يا حبيبتى نورتينى

بس اسفه محدش يقرب من المثاثات

بتاعتى اخرطه علطول

فى حفظ الله

Posted on 29 يوليو، 2009 7:10 م  

ميمى واحمد

الله يبارك فيكم يارب

وانا جايه حالا اهه

Posted on 29 يوليو، 2009 7:10 م  

السلام عليكم ورحمة الله وبركاته
اجابات متواضعة تنم عن شخصية صادقة المشاعر.
أجمل حاجة إن الانسان يبقى عارف نفسه كويس ومميزاته وعيوبه.

خالص تحياتى

نهر الحب

Posted on 29 يوليو، 2009 7:47 م  

نهر الحب

وعليكم السلام ورحمه الله وبركاته
نورتينى يا حبيبتى واسعدتينى
بزيارتك جدا بس ايه رأيك لو عيوب
الانسان اكتر بكتير من مميزاته

فى حفظ الله

Posted on 29 يوليو، 2009 7:54 م  

زى العسل والله
انا كمان بموت فى الحلويات والشيبسي والكلبظ هههههه

تحياتى ومبروك ع الدبلومة

:)

خدى علبة شيكولاتة هدية

:)

Posted on 29 يوليو، 2009 11:27 م  

كده بردو

تستخسري فيا مثاثه؟؟؟

ماشي

أنا سحلاااااااااانه

وااااااء
واااااااااء
واااااااااااااء

طيب كيس شيبسي وخلاص

سلام

Posted on 29 يوليو، 2009 11:50 م  

السلام عليكم


ربنا يسعدك يارب ويوفقك ويحقق ليكى كل ما تتمنى
جزاكى الله كل الخير

احيك على صدق كلامك


انوسه

Posted on 30 يوليو، 2009 12:12 ص  

والله العظيم انتى قلتى الحق موضوع حلو يارانيا وتشكرانوسة على فكرتها انا على فكرة قاعد احسب من ساعتها ولحد الان جمعت بفضل الله 5 حاجات وربنا يسهل ربنا يوفقك يارانيا اه بالحق بالنسبة للحلويات انا هحاول ابعتلك علبة حلويات مشكلة مانتى عارفة انى دمياطى ومنى احلى سلام مصرى دائما

Posted on 30 يوليو، 2009 12:31 ص  

ايه ده كله ايه ده كله؟؟ ايه الجبس ده كله ههههه

ده انتى ما شاء الله قلتى الحق وزيادة

مش عارف ليه حاسس انك ظلمتى نفسك شوية

بس عموما الصراحة مع النفس حلوة

وابقى هاتيلى معاكى شيبسى وقلبظظظظظظظظظظظظظظظظظظظظظ

Posted on 30 يوليو، 2009 12:32 ص  

حدوته

ربنا يبارك فيكى ويكرمك يارب

ومتحرمش منك ابدا نورتينى واسعدتينى

بزيارتك ويارب نتواصل دايما

شكرا على الشوكلاته

فى حفظ الله

Posted on 30 يوليو، 2009 12:58 ص  

sweet angel

ايون طبعا يا حبيبتى

عض قلبى ومتجيش عند

المثاثه بتاعتى اى حاجه الا المصاصه

ممكن اديلك شيبسايه وحدايه

Posted on 30 يوليو، 2009 1:00 ص  

عاشقه الاحزان

وعليكم السلام ورحمه الله وبركاته

ايه النور ده كله يا انوسه

ربنا يستجيب دعائك يارب ويسعدك

فى حفظ الله

Posted on 30 يوليو، 2009 1:02 ص  

لنحيا فى اجواء الحب

اسعدتنى بزيارتك جدا
على فكرة بدخل مدونتك
بس الظاهر فى مشكله فى التعليقات
مش بتفتح معايا خالص
وبص بقى انا عايزة كده قيمه عشرة تمنتاشر قرص مشبك وتشكيله حلويات كده على زوقك المشبك بتاع دمياط حكايه

تقبل تحياتى

Posted on 30 يوليو، 2009 1:06 ص  

بنجاواتى

انا فعلا قلت الحاجات الموجوده فيا

ومافى مشكله ان يكون فينا عيوب لان

اكيد مفيش ملايكه باجنحه على الارض

المهم حضرتك نورتنى وشرفتنى بزيارتك

ويارب يدوم التواصل

هيا شسبسايايه واحده بس اكتر من كده

ماوعدكش ههههههههههههههههههههه

فى حفظ الله

Posted on 30 يوليو، 2009 1:14 ص  

اجاباتك بتدل على حاجتين

بس متزعليش منى لأن هو ده اللى حسيته قوى فى اجاباتك

الطفوله والبراءه


حسيت ان أنتى فيكى براءة الأطفال

حتى حبك لمستلزمات الاطفال وخوفك

وكسوفك

بس بجد شخصيه هايله

دمتى بالخير

Posted on 30 يوليو، 2009 4:30 ص  

تاج جميل جدا
اعجبنى فيك الصراحة المتناهية
حلوة حكاية المطبخ دى
متعمليش حساب عريس قرا البوست ده
هههههههههههه
ربنا يكرمك ويوفقك

Posted on 30 يوليو، 2009 1:17 م  

السلام عليكم
ما شاء الله
إجابات أكثر من رائعة
أتمنى لحضرتك التوفيق
خالص تقديرى

Posted on 30 يوليو، 2009 1:37 م  

الشاعر الحزين

دى فعلا حقيقه

نورتنى واسعدتنى بزيارتك جدا

تقبل تحياتى

Posted on 30 يوليو، 2009 2:11 م  

الخبز قبل الحب احيانا

يا عمى العريس حتى لو مقراش

هنا حتما ولابد هيعرف ويسمع بودانه

ههههههههههههههههههه بس فعلا دى

مشكله عندى بجد ربنا يكرمك يارب

ويدوم التواصل بينا

فى حفظ الله

Posted on 30 يوليو، 2009 2:15 م  

العصفورة
وعليكم السلام ورحمه الله وبركاته

نورتينى ياروح قلبى واسعدتينى بالزيارة

تقبلى تحياتى

Posted on 30 يوليو، 2009 2:16 م  

احلي حاجه حبك للحاجات بتاعة العيال دي
اصلي زيك تماما
بس مش بقول لحد
محدش يعرف الحكاية دي غير روان
اصلي بخطف منها حاجتها
واكلها

طفاااااااااااااسه

Posted on 30 يوليو، 2009 3:08 م  

ابو العريف

ههههههههههههههههههههههههه

مفيش فايده لازم تعترف قدام

نفسك انك عيل اعترافك ده

هو اول خطوات علاجك

هههههههههههههههههههههههههههههههه

نورتنى يا ابو العريف

تقبل تحياتى
فى حفظ الله

Posted on 30 يوليو، 2009 4:06 م  

يا عسل يا رونى
عارفة بقولك يارونى ليه كان لى واحدة صديقتى وبحبها جدا جدا كان اسمها رانيا وكنت بدلعها رونى اتخرجنا من الجامعة والدنيا فرقتنا مش بسبب حد بس لانها اتجوزت بعيد وانا اتجوزت بعيد عن مكان نشأتنا الاصليه ولما افترقنا كده مكانش لسه ربنا بكرمنا وجيبنا موبيلات بقى وبتاع ف معندناش نمر بعض لكنى رغم كل ذلك حين تمر بخاطرى تدمع عينى لانى بجد افتقدتها جدا جدا جدا
علشان كده مصدقت لقيت حد يرجع كلمة رونى دى تانى على لسانى وللصدف العجيبة انها كانت زى ما بتوصفى نفسك بالظبط طيبة جدا جدا تفرح قوى وتزعل قوى وتحب قوى وتغضب قوى وتسامح قوى وتحب عائلتها قوى وكانت فخورة باخوها الصغير قوى وكانت خوافه قوى وساعات تلاقيها شجاعة قوى وتدافع عن اى حد قوى وترد غيبته قوى لكن ممكن تقف عاجزة ومتعرفش تدافع عن نفسها
كانت بتنسى قوى فاللى عايز منها حاجة او بيفكرها بحاجة كان يكتبلها ف كشكول المحاضرات بخط كبير علشان تفتكر
كان عندها فشل ذريع فى المطبخ ورغم كده كانت دائما تسال وتحاول تتعلم وتقول علشان لما اتجوز ما ارجعش بيت ابويا تانى يوم العصر ههههههههههههههههه
ياااااااه اجمل ايام
بس هى كانت مختلفه عنك شويه كانت بتحب الكاراتية والشيتوس مش قلبظ ههههه
ربنا يوفقك يا رونى يارب (انتى)
اشكرك يارونى لانك رجعتيلى ذكريات حلوة قوى قوى لقلبى
وما زلت فى رحلة البحث عن رقم تليفون رونى بتاعتى

Posted on 30 يوليو، 2009 4:25 م  

مامه مازن

ازيك يا حبيبه قلبى

جميل جدا وفائك واخلاصك لصحبتك
وانك منسيتهاش رغم الايام عكس ناس كتير اوى بتكون سهل جدا انها تسأل
عليكى لكن مش بيحصل يارب يطمنك يارب
على رونى بتاعتك
وياستى طالما فيا شبه منها اعتبرينى برده صحبتك ويا ستى قولى يارونى براحه راحتك
بس فى ملحوظه
دانا واعوذ بالله من قوله انا شطوره فى المطبخ وابويا بيقولى نفسك حلو(وش مكسوف)المشكله هى انى بوقع المواعين
والحلل واكسر الكوبايات وكده يعنى
يعنى باعمل دربكه فى المطبخ هههههههههههههه

بجد اسعدتينى بزيارتك ويارب يدوم التواصل بينا

فى حفظ الله

Posted on 30 يوليو، 2009 5:13 م  

هههههههههههههه اه موسيقى تصويرية يعنى
بمناسبة الحاجات اللى بتقع من غير مناسبة دى ياما ياما حصل واللذيذ بقى لو دخلتى تعملى شاى لخطيبك مثلا والمطبخ صوته مسموع للى فى الانتريه وخطيبك قاعد بره سامع اصوات غريبة تزامن حدوثها مع وقت دخولك للمطبخ هههههههههه بتيقى قمة المهزلة ههههه
يارب نفرح بيكى بس من غير حد ما يسمع اصوات غريبة ههههههههههه

Posted on 30 يوليو، 2009 5:54 م  

الاخت / رانيا
لن اتحدث عن جمال التدوينة وبراءتها المفرطة ...
ولا عن اعتزازك وحبك لاخوتك - بارك الله لك في عائلتك وحفظ عليكم سعادتكم - ...
ولن اتحدث عن انه من الصعب ان تمرري هذا السؤال لاحد ... بعد هذة الاجابات التي تجعل من المستحيل ...ان يجاوب احد علي السؤال ... لان اجاباته ستكون ... جامدة بعد اجاباتك المرحة الصريحة
ولن اتحدث عن مقدار حب زوار مدونتك الواضح لك وللمدونة...
ولن اتحدث عن ادبك الجم ... وحرصك علي الرد علي كل تعليق كما لو انه التعليق الوحيد علي البوست
لن افعل ذلك كله ....
ولكن ...ساطلب باكو شوكلاته ...من الفريزر من حضرتك .... بس في هدوووووووووووء ..من غير ما حد يعرف ...
ملحوظة : انا باحب الشوكلاته السادة او بالبندق فقط ... مش الويفر ... او السنكرز
السلام عليكم ورحمة الله وبركاته

Posted on 30 يوليو، 2009 6:07 م  

كماااااااااااااااان

بتقوليها في وشي

طب مش عاوزة منك حاجه

بس بقى

وزعلانه منك

Posted on 30 يوليو، 2009 6:39 م  

مامه مازن

واييه اللى جاب سيره الشاى دلوقتى
على فكرة والله العظيم من الحاجات الصادقه فى حياتى انى باكره اعمل
الشاى باكره اعمل الشاى
ونادرا لما يطلع الشاى مظبوط منى
ان لم يكن من المستحيلات
يلهوى يلهوى هو انا لما اتخطب ان شاء الله هاضطر اعمل شاى لخطيبى
لااااااااااااااااااااااااااااااااااا
مش هيحصل اكيد هيكرهنى بعد ما يشرب كوبايه الشاى بس الحمد لله فى اختراع اسمه الفتله احطها فى المياه واخلص هههههههههههههههههه

ربنا يكرمك ويسعدك يارب يا حبيبتى
فى حفظ الله

Posted on 30 يوليو، 2009 6:47 م  

المهندس

ايون قول كده بتثبتنى بالكلام

الحلو ده علشان فى الاخر عايز شوكلاته

لا والف لا اللى هيقرب من الشوكلاته

بتاعتى هاخرطه حتت
هههههههههههههههههههههههههههههههههه

لا بجد انا مش عارفه ارد على كلام

حضرتك ده ربنا يباركلك ويكرمك يارب

وان شاء الله يدوم التواصل

فى حفظ الله

Posted on 30 يوليو، 2009 6:51 م  

sweet angel

لا ياروح قلبى انا

مقدرش على زعلك ابدا

اللهى اللى يزعلك يموت




بس برده مش هتصعبى عليا

مفيش مثاثه

هههههههههههههههههههههههههههههه

Posted on 30 يوليو، 2009 6:53 م  

المهندس

نسيت اقول لحضرتك

انى ومن هذا المنبر بمررلك السؤال


وياريت تجاوب عليه

Posted on 30 يوليو، 2009 6:55 م  

باتأثر باى حاجه بسرعه جدا جدا



وعلى قد السرعه اللى بتأثر بيها على



قد ما بانسى بسرعه برده بحس انى






عبيطه ممكن تلاقينى مكتئبه وحزينه



لاقصى درجه وفى خلال دقايق ابقى



فرحانه وبارقص واتنطط عادى جدا



دى مسروقه منى

هههههههههههههههههه

دى فيا قوى

Posted on 30 يوليو، 2009 7:15 م  

حلم كان

يعنى فى الحياه زمايل

ليا فى العباطه هههههههههههههههههههه

نورتينى يا حبيبتى

وياستى عيشى وحبى

شخصيتك بكل عيوبها ومميزاتها

محدش واخد منها حاجه

تقبلى تحياتى

Posted on 30 يوليو، 2009 7:29 م  

يا سااااااااتر .... بخيييييييييلة .... ده باكو .... مش علبة بحالها .
لاء مش كمان بخيلة وتسكت ... لالالالا ...كمان بتحطيني في مواقف محرجة ... ايه لزمته ...دوننا عن كل الناس تمرريلي انا السؤال .... طب خلاص هجيبلك باكو شيكولاته .... بس مرري السؤال لحد تاني .... اصل لا هقدر ازعلك واطنش .... ولا هقدر اجاوب .... " السؤال ثثثثثعب يا ميس "

Posted on 30 يوليو، 2009 7:31 م  

المهندس

مفيش فايده دا امر مباشر

ههههههههههههههههههههههه

لازم تجاوب على السؤال

السؤال سهل جدا لو جاوبت عليه

بتلقائيه وبالحاجات اللى فيك فعلا

حتى لو وحشه مفيش اى مشكله

باالنسبه للشوكلاته ايون انا بخيله

بخيله بخيله فى الحاجات الحلوة وخاصه الشوكلاته

Posted on 30 يوليو، 2009 7:39 م  

خلالالالالالالاص عرفناااا انك بخيلة ... اذا كان استخسرتي ..مثاثة في " سويت انجل " ... يبقي معقولة هتديني باكو شوكلاتة بحاااااله
يارب ...يارب كل الشيكولاته اللي عندك يحصل عليها هجووووووم من اطفال العيلة وتخلص كلهااااااااا
بلاش تصري علي حكاية تمرير السؤال ... انا عارف نفسي ... هتكون تدوينة غم ونكد ... مرريه لحد تاني

Posted on 30 يوليو، 2009 7:46 م  

المهندس

بالنسبه للسؤال

بص فى حل من اتنين

يا اما اتجاوب على السؤال

يا اما تجاوب عليه

وانا ديموقراطيه وهاسيب لحضرتك الاختيار

اما بالنسبه لاطفال العيله فانا

كفيله بهم

Posted on 30 يوليو، 2009 8:02 م  

السلام عليكم و رحمة الله و بركاته

أول زيارة لى هنا، و حبيت أحييكى على مدونتك الجميلة و على إجاباتك اللى بتدل على شخصية بريئة وتلقائية

تحياتى ليكى، و مبرووووك النجاح

ربنا يوفقك دائما

Posted on 30 يوليو، 2009 8:28 م  

امري لله ... حاضر ... فقط اتركي لي تحديد الوقت المناسب لذلك ... وبشرط ان تكوني من يدافع عني ... اذا اتهمني الاخرون بالنكد .

Posted on 30 يوليو، 2009 8:33 م  

تاثير الفراشه

اسعدتينى وشرفتينى يا حبيبتى

فى اول زياره للمدونه

وربنا يبارك فيكى يارب ويسعدك

وان شاء الله نتواصل مع بعض دايما

فى حفظ الله

Posted on 30 يوليو، 2009 8:37 م  

بردووووو

دي المثاثه بربع جنيه

مااااااااشي

مخاثمااااااااكي ياوحشه

ياوحشه
ياوحشه

هه بس بقى

بس

Posted on 30 يوليو، 2009 8:45 م  

شكرا بجد لاهتمامك يارانيا وعلى فكرة انا صلحت المشكلة والحمد لله المدونات تمام دلوقتى وتكفى محاولتك الجميلة للمرور فقط وبالنسبة للحلويات اعتبريها وصلت بقى لانى ماعرفشى عنوانك تحياتى ومنى سلام
مصرى دائما

Posted on 30 يوليو، 2009 9:16 م  

جميل ان يكون الانسسان عارف
نفسه..عارف عيوبه..عارف كمان مميزاته

بمناسبه الشكولاته كنت انوى انى اكتب موضوع بعنوان طب الشكولاته!!!وارتباط الشكولاته بالحاله المزاجيه

هى كتير حلوه وجميله

تحياتى

Posted on 30 يوليو، 2009 9:57 م  

المهندس

ايون كده ناس متجيش الا بالعين الحمرا

هههههههههههههههههههههههههههههه

بجد بقى هنستنى اجابه حضرتك وان شاء

الله مش هيكون فى نكد ولا حاجه

ومتخفش وراك رجاااااله هههههههههه


تقبل تحياتى
فى حفظ الله

Posted on 30 يوليو، 2009 10:42 م  

sweet angel

ياروح قلبى هو احنا هنخسر

بعض علشان مثاثايه ولا يهمك

يا ستى باهديلك 3 مثاثات

شبرقى نفسك براحتك هههههههههههههههه

مقدرس على زعلك ابدا

Posted on 30 يوليو، 2009 10:47 م  

طبيبك الخاص

نورتنى واسعدتنى بزيارتك

وفعلا الشوكلاته دى

لها تاثير رهيب على الحاله

المزاجيه وبتريح الاعصاب

تقبل تحياتى
فى حفظ الله

Posted on 30 يوليو، 2009 11:00 م  

لنحيا فى اجواء الحب

حمد الله على سلامه صفحه

التعليقات وانا رحت وتفقدت الوضع فى المدونه عندك بنفسى والامور مطمئنه
والف شكر على الحلويات

تقبل تحياتى

Posted on 30 يوليو، 2009 11:05 م  

ماشاء الله
اجابات عفوية وصريحة
ربنا يكرمك
وتفضلي علي طول كده
هههههههههه
سلام

Posted on 30 يوليو، 2009 11:59 م  

ورده

الله يخليكى يا حبيبتى

شرفتينى واسعدتينى بزيارتك

ويارب نتواصل دايما

فى حفظ الله

Posted on 31 يوليو، 2009 12:08 ص  

السلام عليكم.......
ههههههههههه على الكلام الى انتى حطاه على التعليقات .........................انا ديموقراطيه
انا بس اللى اتكلم
انا بس اللى اقول ده حلو وده وحش
اتفقنا
لا بجد قول اللى فى نفسك.........

اصلى اول مرة اجى عندك بس بجد شكلك عسولة موووووووووت ومش اخر مرة ان شاء الله ....... اجاباتك حلو اووووووووى .....على فكرة الناس الى بتبقى مشاعرها بتدلق منها هههههههه بتبقى طيبة اوووووى وحنينة موووووووت ودى حاجة مش وحشة فى الزمن دا انا كده جدا علشان كه بقول انها حاجة حلوة انها نادرة فى الزمن دوت.......دومتى بخير ....... فى رعاية الله.
shemo

Posted on 31 يوليو، 2009 12:39 ص  

انني ومن منطلق اني مواطن صالح اعرف حقوقي التدوينية جيدا

... واحفظ ميثاق الشرف التدويني عن ظهر قلب

فانني اطالب مساواتي بالصديقة " سويت انجل " حيث اننا مواطنون ... تدوينيون ... لنا نفس الحقوق

لذلك وبناءا علي المواد رقم 112 , 113 , 52211456 ... من قانون المدوونات

فانني اعلن اني لن اتنازل عن عدد 3 بواكي شيكولاته ..بالبندق او/ بدون ... مع الزامك بدفع عدد 2 كيس شيبسي + 2 مثثثاثثة ...علي سبيل التعويض المدني المؤقت ... تعويضا عما اصابني من اضرار

ونشكر عدالة المحكمة علي سماحها بقبول الدعوي
شكرا سيدي الرئيس

Posted on 31 يوليو، 2009 12:56 ص  

سأعبر الموضوع لأشيد بتلقائية المدونة فى المجمل

تحياتي

Posted on 31 يوليو، 2009 1:15 ص  

shemo

وعليكم السلام ورحمه الله وبركاته

نورتينى واسعدتينى فى اول زياره

ليكى وشكرا على الكلام الجميل ده

يا حبيبتى ويارب يدوم التواصل

وتدوم دلدقه المشاعر دى

فى حفظ الله

Posted on 31 يوليو، 2009 1:37 ص  

المهندس

انت تطالب بشيىء ليس من حقك

ياراجل 3 بواكى شوكلاته وكمان

بالبندق وكمان عايز تعويض شيبسى

ومصاصه

يبنى بص على اليفطه اللى ورايا

وشوف مكتوب عليها ايه

العدل اساس الملك

ههههههههههههههههههههههههههههه

طبعا الكلام ده على لسان القاضى

انا مليش دعوة

القاضى يستأنف كلامه

يبنى الدعوى بتاعتك فاشله
ومش هتجيب نتيجه لان كله
كوم والشوكلاته كوم تانى لوحده
اسألنى انا

عموما قررت المحكمه رفض الدعوى
والزام المدعى بالمصاريف وبكيلو شوكلاته بالبندق يديها للمدعى عليه

متبصليش كده ايون كيلو

رفعت الجلسه

Posted on 31 يوليو، 2009 1:51 ص  

حاول تفتكرنى

اهلا بحضرتك نورتنى وشرفتنى بزيارتك

ويارب يدوم التواصل دايما

تقبل تحياتى
فى حفظ الله

Posted on 31 يوليو، 2009 1:53 ص  

عجبتنى جدا إجابتك..و عايزة أقولك انا اتصدمت من كمية الحاجات المشابهة..بيبان عليا و ببالغ فى مشاعرى..الحاجات دى لازم يبقى ليها حل..أصل أنا كمان كده..حلو أوى موضوع الأطفال و الحلويات..خليتنى نفسى تروح للشوكلاته..بجد عجبتنى أوى..

Posted on 31 يوليو، 2009 1:56 ص  

السلام عليكم

ماهذه المصاصة التي أرى

أكلبلظ بعثت من جديد ؟

هههههههههههههههه

حقيقي اجابات متميزة جدا
ان دلت على شيئ تدل على انك شخصية طيبة
ربنا يبارك فيكي

وبما اني عندي هوايات كتيرة جدا
هبدأ بأول هواية وهي هواية العصر
ههههههههههه اقصد عصر صاحب او صاحبة التدوينة التي أقرأها

اول حاجة هاقتبس الحتة دي :

"والنسيان ده بيسببلى كوارث
وكمان ايديا مفشكله كل لما ادخل المطبخ
تسمع اصوات عجيبه حلل بتقع
واطباق بتتكسر
لدرجه انى واحده من امنياتى انى لما ادخل المطبخ اهل البيت يحسوا بالهدوء اصل الصراحه قربو يتشلوا منى ههههههههه"

حلوة جدا تسمع اصوات عجيبة ، حلل بتقع واطباق بتتكسر هههههههههه

بجد جميلة الحتة دي وموتتني من الضحك
وان دلت على شيئ تدل على انك من هواة المطبخ جدا وطهاية طهاااااية
ههههههههههههههه

ولفت نظري جدا الصور اللي حضرتك حاطاها على جدران المدونة بصراحة انتي عايشه حالة طفولية غير عادية

انتي ميتسكتش عليكي ، لالالا انتي لازم نبلغ عنك ههههههههههه

ربنا يوفقك

تقبلي مروري

في حفظ الله

Posted on 31 يوليو، 2009 3:22 ص  

السلام عليكم

اجمل ما في الانسان ان يكون جميلا قلبا وقالبا

فكوني هذا عجبتني صراحتك في شخصيتك
لكن حاولي ان لا تضيعي حققك بيدك
ولا تخجلي في قول الحق

سواء لكي او لغيرك
تحياتي

Posted on 31 يوليو، 2009 10:18 ص  

السلام عليكم
تحية طيبة
الزيارة دي مش خاصة قوي متأسف لو مش بتحبي الإعلان جوة التعليقات بس ده أمر مهم وخاص جدا
دي دعوة لمتابعة الإقتتاح الجديد لمجلة رؤية مصرية يوم السبت 1/8/2009
roaua.com
هتنور المجلة بوجودك
محتاج رأيك ومشاركتك معانا ولو عاوزة تنضميلنا تعالي يلا معانا
مستنيكي
خالص تحياتي

Posted on 31 يوليو، 2009 10:27 ص  

في خبر عاجل تناقلته وكالات الانباء ... قررت حركة " الحلويات للجميع " ... وحركة " شباب ...شيكولاتة بلا حدود " ... تنظيم وقفة احتجاجية ... امام ...ابواب مدونة " ليس فقيرا من يحب " ... نظرا لتعنت صاحبة المدونة " رانيا " في توزيع .. الحلويات علي زوار المدونة
وصرح " المهندس " ...المنسق العام للحركة ... بأن الاخت / رانيا ... ترفض تنفيذ احكام القضاء ...واجبة النفاذ في توزيع عدد 1 باكو شيكولاته + مثثثثاثة + كيس شيبسي او حاجة ساقعة ...علي زوار المدونة .... وان شباب الحركة سيظلوا .. " معتثمين " حتي تقوم صاحبة المدونة بتنفيذ احكام القضاء.
هذا وقد تسبب هذة الانباء في اضطراب كبير في اسواق ...الحلويات والشيكولاتة ...العالمية ...حيث هبط مؤشر ... " جالاكسي " بنسبة اكثر من 5 % في افتتاح التداول اليوم ... ولم يعرف التأثير علي موشر " كادبوري " حيث يتعطل العمل علي السهم يوم الجمعة.
وسنواليكم باخبار الاعتصام ... في خدماتنا الاخبارية اللاحقة
كان معكم من امام مدونة " ليس فقير من يحب " ... قلبظ المقلبظ

Posted on 31 يوليو، 2009 1:03 م  

Rosie

ازيك يا حبيبتى ربنا يباركلك يارب
نورتينى واسعدتينى بزيارتك بس الحاجات اللى بتقولى عليها دى ملهاش حل
دى جزء من شخصيتنا وصعب اوى تتغير حتى لو حاولنا انا مثلا نفسى بجد انفعالى ميبنش عليا فى لحظتها لان ده بيحطنى فى
مواقف محرجه لكن مقدرتش اعمل كده
بس طالما مبنئذيش حد مش شرط اننا
نصعب على نفسنا ونحاول نتغير

ايه الرغى اللى انا فيه ده
ههههههههههههههههههههههههه

تقبلى تحياتى
فى حفظ الله

Posted on 31 يوليو، 2009 2:23 م  

قلم رصاص

ايون طبعا طهااايه

حد يستجرى يقول غير كده(وش شرير)
ههههههههههههههههه

واحنا فينا من كده تبلغ عنى ماشى(نفس الوش الشرير)

طيب انا كنت ناويه اديك قلبظ بس خلاص
مفيش ولا حتى قلبظايه وحده هه

حضرتك بجد شرفتنى واسعدتنى جدا

وان شاء الله يدوم التواصل بينا

فى حفظ الله

Posted on 31 يوليو، 2009 3:13 م  

قلم رصاص
الكلام اخدنى ونسيت ارد السلام
وعليكم السلام ورحمه الله وبركاته

Posted on 31 يوليو، 2009 3:14 م  

ذكرى رحيل قلم
وعليكم السلام ورحمه الله وبركاته
ازيك يا روح قلبى وازى اخبارك
نورتينى بجد
وطبعا المفروض الواحد ميتكسفش
من انه يطلب حقه بس انا كده
ومعرفتش اغير طبعى ده
تقبلى تحياتى
فى حفظ الله

Posted on 31 يوليو، 2009 3:20 م  

كاتب مصرى
وعليكم السلام ورحمه الله وبركاته

باذن الله هاجى
ربنا يوفقكم يارب

فى حفظ الله

Posted on 31 يوليو، 2009 3:23 م  

المهندس

ايه يا عمى دا الاعتصامات
دى شغلتى هابلغ امن الدوله
لان ده اخلال بالنظام العام
ومحاوله لقلب النظام وحضرتك
عارف احنا مبنرحمش وخصوصا لما
يتعلق الامر بالشوكلا قصدى بقلب
النظام وحضرتك بقه متعرفش
امن الدوله واللى بيحصل فيه
(وش بيضحك ضحكه شريره)
ثم كده انتو معلطلين حركه الدخول والخروج للمدونه وانا ممكن ارفع قضيه
تعويض عادى بسبب الاضرار التى حطت على دماغى ههههههههههههههههههههههههه

Posted on 31 يوليو، 2009 3:29 م  

اجابا حلوه

ومدونه احلى

سعيده بمروري من هنا

لك ودي :)

Posted on 31 يوليو، 2009 3:52 م  

اقصوصه

ربنا يكرمك ويخليكى
ياحبيبتى
نورتينى واسعدتينى فى اول زيارة
وان شاء الله نتواصل دايما

فى حفظ الله

Posted on 31 يوليو، 2009 4:01 م  

الف مبروووك على الدبلومة ولو انها متاخرة

وايناس مسبتش حد الاوبعتتله السؤال الصعب ده
حرام عليكى ياايناس :)

برافوو عليكى يارانيا
اجابات جميلة

فكرتينى بمقولة بتقول

انت انسان رائع
فانت حالة انسانية نادرة ليس منك اثنين..

تحياتى ياقمرى

Posted on 31 يوليو، 2009 7:39 م  

وما زلت اتعلم

الله يبارك فيكى يارب يا حبيبتى
ومش عارفه اقولك ايه على كلامك
الرائع ده ربنا يباركلك ويسعدك
يارب

تقبلى تحياتى
فى حفظ الله

Posted on 31 يوليو، 2009 7:52 م  

بعد فشل الحلول القضائية لمشكلة " الحلويات الكبري "


بعد تعنت المدونة " رانيا " صاحبة مدونة " ليس فقيرا من يحب "


وبعد فشل الحلول السياسية والدبلوماسية ... " حيث استعانت برجال الامن في تفريق المدونون المعتصمون امام مدونتها "


لذا نعلن عن قيام تحالف ... لتنفيذ عملية " عاصفة البندق " ... لتحرير مخزن الحلويات من تحت يد صاحبة المدونة


التحالف مفتوح لجميع الاشرار ...نيهاااا هااااا هاااا ... ولجميع محبي ...الشيكولاته ... والحلويات ... ولجميع الاطفاااااال ...اللي بتحاربهم " رانيا " في حلويااااااتهم

ابقي وريني هتهربي من التحالف ده ازااااااااي

Posted on 31 يوليو، 2009 11:49 م  

اجابات جميلة
واضحك الله سنك
ربنا يبارك فيكي
ويجعل اوقاتك في ميزان حسناتك

Posted on 1 أغسطس، 2009 12:12 ص  

اجابات دى وان دلت على شئ هتدل على انك بنوتة زى العسل وانك قلبك ابيض جداااااااا
مرسيى ياقمر للمرورك على المدونة وانا سعيدة انى اتعرفت عليكى وعلى المدونة

Posted on 1 أغسطس، 2009 3:43 ص  

عجبنى اوى طريقه الكتابه كنت بضحك مع كل سطر

Posted on 1 أغسطس، 2009 7:32 ص  

المهندس

طيب وليه الطيب احسن

انا خلاص استسلمت ورفعت الرايا

البيضا وهاديك باكو شوكلاته

مفيش غيره ونعمل تصالح ونفك المشكله

Posted on 1 أغسطس، 2009 5:30 م  

هعزف لنفسى

ربنا يكرمك يارب ويسعدك

ويتقبل دعائك

نورتنى واسعدتنى بزيارتك

فى حفظ الله

Posted on 1 أغسطس، 2009 5:32 م  

ايوشه

انا اسعد يا حبيبتى

متشكرة جدا على كلامك الجميل

ويارب يدوم التواصل بينا

تقبلى تحياتى
فى حفظ الله

Posted on 1 أغسطس، 2009 5:34 م  

M.Nazem -popo

اهلا وسهلا بحضرتك

نورتنى واسعدتنى فى اول زيارة

ان شاء الله نتواصل دايما

تقبل تحياتى

Posted on 1 أغسطس، 2009 5:36 م  

يا افندم ... احنا نزودها لحضرتك

شكلك كده استسلمتي عشان بتستعدي لبوست جديد

انا رديت علي تعليق حضرتك بمدونتي ...التي تشرفت بزيارة حضرتك لها

وطبعا من دواعي سسروري ... وشرفي انه حضرتك تشتركي في الدعوة ليوم " البهجة " علي صفحات مدونتك ...الرائعة

وكما اسلفت في تعليقي ...حضرتك بعد ما تنشري مساهمتك ...في يوم 10 اغسطس ... انت مدعوة - وكل من تصطحبينه - لتشريف مدونتي المتواضعة ... والمشاركة في الملتقي التدويني الالكتروني الاول ...علي صفحات مدونتي ... الخدمة لدينا "Five Stars " وبدون مقااااابل ...

دوامي علي تشريف مدونتي بالزيارة ... فمازال هناك العديد من المفاجات ...التي سنعلنها تباعا - ان شاء الله - بخصوص ...دعوة يوم " للبهجة "

شكرا والسلالالالام عليكم

Posted on 1 أغسطس، 2009 5:50 م  

المهندس

ايه فايف ستارز ازاى هتوزعوا شوكلاته

ومصاصه على المدونين

لو كان كده انا هاجرش فى المدونه

من الفجر

بس ايه اسلفتى وداومى والكلام الكبير ده

هههههههههههههه كلامك فصيح بجد

تقبل تحياتى

Posted on 1 أغسطس، 2009 8:01 م  
 

template By: Free Templates