السلام عليكم
ياه يا عيال مع انى مش متابعه قوى للكورة بس
فرحت من قلبى وكنت هاتشل وانا بسمع الماتش
اتارى الفرحه حلوة يا جدعان
بس ابويا فلت منى النهارده اصل فى كاس الامم الافريقيه
كان بيحاسبنا الجون بجنيه وبعدين ممكن نتفاوض لما مصر تكسب
ونخليهم خمسه جنيه على بعض هههههههههههههههه
ان شاء الله كاس العالم بقى الجون بخمسه جنيه
مبرووووووووووووووووووووك لمصر وعقبال الجاى
ان شاء الله
جالى تاج من رئيس جمهوريه شومبونجو بذات فخامته وكمان من شوكلااااااااااااتتى
حبيبتى هاجاوب عليه لاحسن اروح فى حديد
اسمك؟
رانيا بنت على حفظنى الله ورعانى
سنك؟
لا بقى اللى عامل التاج ده جاسوس وعميل علينا نحن بنات حوا
يا راجل دا اكتر حاجه تخنق حوا انك تسألها انتى عندك كام سنه
وبعدين احنا عند العشرين والعمر بيقف وكل سنه بتعدى بعد العشرين
بتبقى مرار بعيد عنكم بس انا بقى ولا بيهمنى عندى 23 سنه و7شهور
.اسم مدونتك؟
ليس فقيرا من يحب
مجال دراستك؟
العلوم والتربيه مع شويه حبشتكانات فى علم النفس
.هل فكرت فى اغلاق مدونتك؟والسبب؟
لا ولله الحمد مفكرتش فى كده اسيبكم واروح فين يعنى
كابسه على مراوحكم دايما باذن الله هتروحوا منى فين؟؟؟؟؟
ايه رد فعلك لو حد قل ادبه عليك في المدونه؟
انا عندى منطق كده سفاله اللى قدامك متجبركش ابدا انك تكون سافل
فهاقوله ربنا يسامحك انا مؤدبه ومش هارد عليك
.أسوا مدونه دخلتها؟
لا الصراحه انا عطيت كتير فى المدونات فمش مركزة الحقيقه
.هيحصل ايه لايميلك بعد ماتموت؟
يا ساتر يارب بتفول فى وشى كمان هههههههههههههههههه
لا الموت علينا حق ولما اموت الايميل يتنيل بستين نيله
انا هابقى فى ايه ولا ايه يعنى
.اديت الباسورد لحد قبل كدة؟
ايون اديته لنوارة شطبتلى المدونه
.السفر بالنسبه ليك؟
دوخه وقرف وترجيع وموت روحى مش بترد فيا الا لما انزل من العربيه
وده فى حاله سفر النهار
متعه وروقان وحلم جميييييييل فى حاله السفر بالليل
المود بتاعك اية؟
يلهوى على المود والكلام النايتى اللى بيشلنى ده
لما حاجه تزعلنى بازعل ولما حاجه تفرحنى بافرح ولما حاجه
تخنقنى باتخنق عادى يعنى بس مودى فى اللحظه اللى باكتب
فيها هو حاله من التناحه المؤقته ربنا يكفيكو شرها
.بتعمل اية فى وقت فراغك؟
باجيب مصاصه او بنبونى واقعد اضرب وانا باتفرج على التلفزيون
او ادخل المطبخ واقعد اخترع اى حاجه او اروح اناكف فى امى
وبعدين عيب عليك يا راجل فراغ مين دا انا مانتخه 24 ساعه
.
الاكلات المفضلة؟
كل خيرات ربنا باكلها واخص بالذكر الحلويات المكرونه بالباشميل والفراخ المشويه
والفول والطعميه والفسيخ مع شويه بصل ولمون يلهوتى جناااااااااااااااااااااااان
الصفات التي اخدتها عن والدك؟
الجرأه من غير ابتذال والكرم الغير عادى مش انا دا ابويا
كان نفسى اخد من ابويا سرعه البديهه واللباقه وبعد النظر
الصفات التي اخدتها عن والدتك؟
الحنان الغير عادى والطيبه لدرجه الهبل والكسوف حتى لو اضيع حقى
اكتر 6 حاجات بتحبهم؟
مش هاقول مناجاه ربنا او قراءه ورد من القرءان فى وقت قلبك يكون مفطور
ومحتاج حد يخفف عنك وبعدين اشمعنى 6 يعنى انا هاقول 10 هه
- دعوة امى ليا ربنا يسعدك لما الدنيا تستعجب لسعدك وهناكى
- المناقرة مع ستى(جدتى) للى مش عارف ليفتكرنى شغاله ولا حاجه
ودى بتكون نموذج لصراع الاجيال عمرها ما اقنعتنى برأيها وعمرى ما اقنعتها برأيى - المطبخ وافهموها براحتكم يمكن اكون باحب التلاجه او الحلل
واللى فى الحلل وفى الاخر يعنى احتمال اكون باحب اطبخ - الضلمه بس مش دايما لما النور يقطع بس كفايه لاحسن تعبت
اكتر 6 حاجات بتكرهم؟
مش هاقول برده باكره الظلم او اسرئيل او البطاله او مبارك او الخيانه
او التطبيع او الاحساس بالعجر قدام مشكله لحد من حبايبى ولكن هاقول
- باكره النت لما يستغبى عليا
- باكره لما حد يولع النور او يتكلم وانا نايمه
- باكره حد يدعى عليا مع انى عارفه ان الدعا على قد الظلم بس برده
- باكره لما ابقى نايمه وتيجى ناموسه بنت حرام تفضل تزن على ودانى
شخصيتك نوعها ايه؟
متقلبه فيا كل المتناقضات عصبيه وهاديه
خجوله وجريئه عقلى كبير وعقلى اصغر من عقل اعيل عيل
مرحه وحزينه كل حاجه متناقضه فيا
.لماذا دخلت عالم التدوين من الاساس؟
كنت قاعده اتصفح النت لا بيا ولا عليا شفت مدونه فكرة انى اعمل مدونه
فضلت تلعب فى دماغى مده ورحت عامله مدونه
اهميه التعليقات بالنسبه لك؟
مهمه بطريقه غير عاديه احس انى باتواصل مع الناس واحس انهم
فعلا اتخنقوا منى ومن اللى باكتبه ولعلمكم فى ناس بتتاخد غياب
وهما عارفين نفسهم وهأخصم منهم اعمال السنه وكمان هاعملهم
كحكه كبيره فى الشهاده هه
.
احلي بوست كتبته مع ذكر السبب
بوست ليس فقيرا من يحب مش عارفه ليه الحقيقه
ومن احلى البوستات اللى كان التفاعل فيها عالى بوست العيد
وكميه الناس اللى عيدت عليا اينعم كان اورديحى لان الشعب كله مفلس
بس حسيت بكميه مشاعر طيبه غير عاديه
افضل مدونه قريتها
ياااااااااااااه كتير جدا مشاء الله كل حد مميز بحاجه
اهميه الانترنت
سكينه ممكن تعورنا وممكن تساعدنا بس فى الاخر
مبنستغناش عنها
اهدى التاج لكل الناس اللى عندى فى الريدر وكل اللى مش جاوب عليه
اقعدوا بالعافيه التعليقااااااااااااااااااااااااااااااااااااااات فوقملحوظه كبيييييييييييييييييييييييييييييرة الريدر اتمسح منى بقدرة قادر وهارجع اجمعه من تانى باذن الله
Atom Feed (xml)
